Maŋŋel go Tom Høgli heittii spábbačiekčin, de lea bargan Romssa valáštallanjoavkku servodatoktavuohtan. Dál guođđá dan doaimma ja ohcagoahtá ođđa hástalusaid.
Skánitlaš Tom Høgli (38) lea bargan Romssa valáštallanjoavkku (TIL) servodatoktavuohtan dan rájes go heittii spábbačiekčin 2018:s. Son lea earret eará leamaš mielde ásaheamen RomsaDál prošeavtta, mii galgá eastadit sámevaši ja oainnusin dahkat sámevuođa Romssa gávpogis.
Tom Høgli lea čiekčan sihke Norgga ja Sámi riikkajoavkkus, son lea maid čiekčan Bodø/Glimt joavkkus, Club Brugges, FC Københavnas ja TIL:s.
– Lea sihke gelddolaš ja issoras guođđit spábbačiekčama. Profešunealla spábbačiekčan han leamaš oassin mu eallimis 2003 rájes, nu ahte dál gal rivdet beaivvit. Dovddan ahte dá lea rievttes mearrádus ja rievttes áigi geahččalit juoidá eará, lohká Høgli TIL neahttasiidduide.
Tom Høglis lea oahpaheaddjeoahppu ja áigu ain orrut Romssas gos sus lea bearaš, muhto ii loga vel diehtit maid áigu bargat ovddasguvlui.
