Porsáŋggu sátnejođiheaddji Aina Borch lea mearridan ahte ii searvva šat gielddaválggaide.
Fargga lea Aina Borch leamaš Porsáŋggu sátnejođiheaddjin gávcci jagi. Dál dieđiha ahte guođđá politihka, son ii dáhto searvat boahtte jagi gielddaválggaide.
– Mun lean vuđolaččat árvvoštallan ja ovttas iežan lagamusaiguin mearridan ahte in searvva šat gielddaválggaide boahtte áigodagas. Dán lean odne dieđihan nominašuvdnalávdegoddái, čálii Aina Borch iežas almmolaš Facebook siiddus maŋŋebárgga.
Aina Borch ovddasta Bargiidbellodaga. Son lea eret Ávanuoris, muhto lea ássan Leavnnjas 30 jagi. Dál lea gearggus jođihit gieldda vel jagi.
– Lean giitevaš ja njuorasmahttá go lean beassan leat sátnejođiheaddjin máilmmi fiidnámus gielddas. Dán doaimmas lean leamaš masá gávcci jagi, ja dál lean ge čađaheamen maŋimuš jagi sátnejođiheaddjin. Dat lea veahá váivi, muhto seammás illudan guorragoahtit ođđa bálgáid. Mun áiggun dieđusge bargat nu bures go vejolaš Porsáŋggu ovddas dassážii go ođđa sátnejođiheaddji lea sajis 2023 golggotmánus, čállá son.
