-Almmuhus-
-Almmuhus-
OĐĐASAT – Gumppe ferte bivdigoahtit ovttatmanus

– Gumppe ferte bivdigoahtit ovttatmanus

-

-

– Dat manná beare guhkes áigi ovdal go addo lohpi báhčit gumppe mii speadjá boazoealuin ja sávzaealuin, oaivvilda Kárášjoga johttiidsámesearvi, mii lea NBR stuorimus báikkálaš searvi.

– Boazodoalloguovlluin, mat gullet boranávdeguvlui 8 Romssas-Finnmárkkus, eai galgga leat gumppet. Jus navdet gumppe roasmmohuhttán bohccuid dahje sávzzaid, de galgá addot báhčinlohpi dasttánaga, nu ahte bivdu ja ráppiid obduseren sáhttá dáhpáhuvvat oktanaga, lohká Kárášjoga johttiidsámesearvvi jođiheaddji Leif Anders Somby preassadieđáhusas.

Disdaga almmuhuvvui ahte Fylkkamánni lea addán báhčinlobi Fiettar orohaga badjeolbmuide, dalle lei gumpe speadjan jo badjel vahkku.

 

Stáhta ovddasvástádus – boazodoalu táhpa

– Dan botta go eiseválddit ájahallet addimis báhčinlobi ja iešguđet heajos ákkastallamiiguin, de bálle gumpe eambbo vahágiid dahkat.

Kárášjoga johttiidsámesearvvi jođiheaddji oaivvilda ahte dain guovlluin gos eai galgga leat gumppet, de berrejit čađahit doaimmaid kronologalaččat.

– Vahágat maid navdet gumppe bargan, galgá báhčinlohpi addot ja bivdu álggahuvvot dasttánaga. Jus obdukšuvnnas čájehuvvo ahte ii leat gumpe, de gesset ruovttoluotta báhčinlobi. Jus čájehuvvo ahte lea gumpe, de joatká bivdu, ja maiddái helikopteriin galget bivdit gumppe, oaivvilda johttiidsámesearvi preassadieđáhusas.

 

Ballet ahte gumpe lea sirdásan

Das viidáseappot čállet ahte jus jođánit álggahuvvo bivdu, de olaha guokte ášši.

Okta lea dat go dat lea buoret vejolašvuohta gávdnat gumppe, ja nubbi lea ahte hehttejit eanet vahágiid dan ovdii go šaddet vuordit báhčinlobi.

Erenoamážit dán áiggi čakčat, go lea váttis gávdnat luottaid ja ráppiid oanehis áiggis, de lea dehálaš ahte hálddašeaddji lea jođán addit báhčinlobi.

– Mii ballat ahte gumpe lea guođđán dan guovllu gos bivdojoavku lea ohcame gumppe, ja ahte ollu vaháguvvon bohccot eai gávdno, dahje leat nu borahallan ahte ii oainne mii dan lea vahágahttán, lohká Somby loahpas preassadieđáhusas.

 

-Almmuhus-