Skandinávias leat duođaštuvvon unnit gumppet mannan dálvvi go ovddit dálvvi. Sihke Norggas ja Ruoŧas unnu máddodat.
Rovdata čállá preassadieđáhusas ahte mannan dálvvi gumpebearráigeahču logut čájehit ahte Ruoŧas leat unnon gumppet eambbo go Norggas, vaikko Norggas maid leat duođaštuvvon unnit gumppet go ovddit jagiid. Gumpemáddodat registrerejuvvo jahkásaččat sihke Norggas ja Ruoŧas ja gumpemáddodat dán guovtti riikkas lea oktasaš Skandináviamáddodat.
Skandináviamáddodat lea rehkenaston leat 380 gumppe. 300 dáin leat Ruoŧas.
40 Válvvi Skandinávias
Mannan dálvvi registrerejuvvojedje 40 gumppeválvvi Skandinávias. 28 dáin ledje Ruoŧas, guhtta Norggas ja guhtta leat rádjáválvvit mat leat sihke Norgga ja Ruoŧa bealde.
Dárbbahit genaid nuortan
Lea bures duođaštuvvon ahte Skandinávia gumpemáddodat gillá go váilot genat olggobealde. Skandinávia gumpemáddodat dárbbaha genaid nuortan, Ruošša ja Suoma bealde gumppiin vai oččoše varas genaid.
– Mannan dálvvi registreriimet golbma gumppe mat bohte nuortan. Guokte dáin báhččojedje Finnmárkkus skábman ja dat goalmmát guoraduvvui Norrbottens länas cuoŋománu, dadjá Rovdata gentihkkár, Øystein Flagstad preassadieđáhusas.