Muhtin boanda Aremark guovllus fuomášii mannan sotnabeaivvi ahte gumpe lei speadjan su sávzzaid giettis. – Lea dego váivvimus deattán, lohká Østfold Boandasearvvi jođiheaddji.
Stáhta Luonddubearráigeahču (SLB) guovllu stuorra boraspiriid fágaovddasvástideaddji, Ida Glemminge duođašta NRK:i ahte gumpe lea speadjan sávzzaid, čállá NRK.no.
– Dássážii leat gávdnan 28 sávzza ja guokte maid lea ferten goddit. Dasa lassin muitaluvvo ahte váillahit eanet sávzzaid maid eai leat gávdnan, lohká Glemminge.
SLB lea duođaštan speadjama ja mo sávzzat leat skáidnejuvvon. Østfold boandaidsearvvi jođiheaddji Ole-Kristian Bergerud mielas lea dát issoras, erenoamážit go dál luoitigohtet boanddat šibihiid guohtumiidda. Lohká son ballá ahte boanddat eai arvva luoitit šibihiid guohtumiidda. Boanda, gii ii háliit iežas nama medias, muitala ahte son lei áidon stuorra guovllu boraspireeastadanáiddiin.
Aremark lea njealját boraspireguovllus, Oslo/Akershus/Østfold, ja oktan viđat boraspireguovlluin Hedemárkkuin, leat jahkásaš mihttomearrin njeallje gitta guhtta čivgama ja golbma galget leat Norggas. Aremark lea Ruoŧa rájá lahka.
