Sámediggeráđđi Berit Marie E. Eira lohká buorren go gumpe goddui.
Stáhta Luonddubearráigeahčču gottii ikte gumppe mii lea speadjan sávzzaid ja bohccuid Sis-Finnmárkkus.
– Gumpe ii galgga leat dáppe ja ammahal dál ipmirdišgohtet hálddašeaddjit maid sápmelaš oaivvilda go dadjá ahte borespirehálddašeddjiin ii leat diehtu man olu duođai leat boraspiret ja makkárat, čállá ráđđelahttu Berit Marie E. Eira Sámedikki Facebookas.
– Ádjánan beare guhká goddit
Eira mielas leat ádjánan beare guhká goddit gumppe, ja gumpe lea dahkan vahágiid guohtunealáhusaide maid ruđat eai buhtat ja lassi barggu ealáhusaid olbmuide.
Lassin lea vuorjan johtti ealuid.
– Dieđán man garrasit sihke sávzaboanddat ja boazodoallit šadde guođohit vai gumpe ii speaja. Dat čuzii sihke olbmuide ja fievrruide, dadjá Berit Marie E. Eira.
