Váile guokte vahku dassái Anára Čaarmauaivai meahcceguovllus Suomas gumpe gottii beatnaga, mii lei mielde meahcástanbarggus. Fuođđovahátregistera mielde dát lea njealját beana, man gumpe lea goddán Lappi guovllus maŋimus logi jagi áigge.
Ovddit dáhpáhus lei jagis 2013, go gumpe gottii beatnaga Salla guovllus. Jagi ovdal, 2012:s, gottii gumpe beatnaga Durdnosa guovllus ja Soađegili guovllus fas 2011:s, čállá Yle Sápmi.
Anára gieldda eanandoalločálli Minna Pulju muitala, ahte sidjiide lea boahtán almmuhus das, ahte Anáris gumpe lea goddán beatnaga. Son muitala, ahte gaikun- ja borranluottat čájehit, ahte sáhka lea gumppes. Dán dáhpáhusa dihte eai boađe makkárge doaibmabijut gumppe ektui, dasgo sáhka lea ovtta dáhpáhusas, muitala Pulju. Goddinlobi ohcama gieđahallá fuođđoguovddáš.
Boarráset rihkuskonstábel Iikka Rantahalvari Anára bolesis muitala, ahte ášši lea maiddái sin dieđus iige dat gáibit doaimmaid bolesis. De livččii eará dilli, jus livččii sáhka máŋgga dáhpáhusas dahe jus gumpe jorešta lahka orrunguovllu. Rantahalvari muittuha, ahte buot akuhtta várradiliin mat gusket olbmuide, galgá almmuhit bolesii ja jus lea heahti, de heahteguovddážii.
– Jus gumpe boahtá orrunguvlui johtit, de dat dagaha midjiide maiddái doaibmabijuid. Vuosttažettiin ádjit dan gumppe eret.
