Sevdnjes eahkediid lea gelddolaš veaháš guldalit balddonasaid ja ipmašiid birra. Dán áššis leat buot oasit min podcast-ráiddus «Ipmašat».
Niillas Ánde Eira muitala Ássebáktestálu birra
Ovdalaš áigge lávejedje juovlavuoddjit herggiiguin johtit Ássebávtti meattá Kárášjohkii. Muhto dán guolbanis vásihedje heargevuoddjit imašlaš dáhpáhusa. Jergolaš, Niillas Ánde Eira, muitala fearána mii balddihii dan čieža juovlavuoddji, juovllaid áigge 1952:s.
Oainnáhus Giđđavággegierrasis
Ellen Anne Hætta Eira lei 16-jahkásaš go vásihii dakkár oainnáhusa man ii goassege nuppes leat oaidnán. Oainnáhus lei mearragátte guovllus, Giđđavággegierragis.
Dološ koahka lávkkit Máze giliviesus
Ánte Niillas Eira, dahje Nigá, lei máŋga jagi Máze valáštallansearvvi jođiheaddji. Muhtun eahkeda lei son akto bargame kantuvrras Máze giliviesus go fáhkkestaga gullogohte jienat. Sáhttet go leahkit dološ koahka lávkkit mat ain gullojit giliviesus vai leat go dušše boares vistti jienat mat skillet? Ja manne Nigá biila ii vuolgán go áiggui báhtarit?
Nigás, dahje Ánte Niillas Eiras, leat máŋga fearána ja vásáhusa Máze giliviesus. Mii lea mii vázzá tráhpas ihkku ja vuorjá gussiid geat idjadit giliviesus? Ja mii dáhpáhuvai go mánná fáhkka deaddiluvvui seainni vuostá? Dán oasis gulat Nigá muitaleame vel golbma fearána mat galget leat dáhpáhuvvan Máze giliviesus.