Porsáŋggu gielda dieđiha ahte gieldda buhcciidossodagas Leavnnjas lea njealji bargái ja guovtti buohccái njommon korona njoammudávda.
Porsáŋggu gieldda sadjásaš sátnejođiheaddji Sylvi Johnsen dieđiha gaskavahku iđida ahte Porsáŋgu gielddas lea duođaštuvvon ahte Porsáŋggu gieldda buhcciidossodagas leat covid-19 njoammudávda njommon njealji bargái ja guovtti buohccái, preassadieđáhusas.
Buohkat leat biddjon erremii, maiddái lagašolbmot, ja gielda lea guorragoahtán gos njoammun lea vuolgán. Buhcciidossodahkii besset olbmot dušše erenoamáš dilis jus lea sohppojuvvon ovddalgihtii. Porsáŋggu gieldda roassojođihangoddi čoahkkinastá dál ja buktá lasi dieđuid tiibmu 12.00 gaskavahku, skábmamánu 4. beaivvi.
– Maŋŋit maŋŋebárgga eahkedis oaččuimet dieđu ahte guovtti olbmui lea velá njommon covid-19 dávda, nu ahte dál lea njealji bargái ja guovtti buohccái njommon dávda. Mii leat dál guorragoahtán gos dat njoammudávda lea vuolgán. Mii leat gávnnahan ahte dávda lea buhcciidossodagas go sihke bargit ja buohccit gullet buhcciidossodahkii. Dat ossodat leamaš erremis guhkit áiggi juo ja mii leat dál bargamin sirdimin bargoveaga vai buhcciidossodat ain lea doaimmas. Eará buohccit dan ossodagas han fertejit oažžut dárbbašlaš divššu, lohká Porsáŋgu gieldda sadjásaš sátnejođiheaddji Sylvi Johnsen.
Guhkes njoammunáigi
Sadjásaš sátnejođiheaddji Sylvi Johnsen lohká son sáhttá buot oapmahaččaid jeđđet ahte sii váldet oktavuođa singuin ja muitalit mo dilli lea. Dál leat sii velá vuđolabbot guorramin gos dávda lea vuolgán.
– Mii váldit covid-19 iskosiid máŋgga geardde, ovdal go olbmot besset erremis, čilge sadjásaš sátnejođiheaddji Sylvi Johnsen.
Su mielas lea hui imaš go dávddas lea nu guhkes áigi dan rájes go olbmui njoammu dávda dassážii go ieš buohccá. Go ieš ii dieđe ahte sus lea dávda, de sáhttá earáide dieđekeahttá njoammudit dávdda.
– Dat mii lea hástaleaddji dáinna covid-19 dávddain, lea ahte mii leat váldán iskosiid olbmuin ja bohtosat čájehit ahte iskkus lea negatiiva. Muhto go gerget logi beaivvi erremis, ja go mii váldit iskosa sis fas, de čájeha iskkus ahte lea positiiva. Lea hui imaš go áigi man rájes alcces lea dávda njommon ja ieš buohccá lea nu guhkki. Lea hui buorre ahte mii váldit iskosa moatte geardde ovdal go olbmot besset eret erremis, lohká Sylvi Johnsen.
Doarvái bargit
Porsáŋggu gieldda sadjásaš sátnejođiheaddji Sylvi Johnsen muitala sii kártejedje 2020 njukčamánus galle buohccedivššára leat gielddas ja sáhttet go sii veahkehit gieldda jus lea dárbu. Dál leat sii gulahallan gieldda fitnodagain gos dat bargit dál lea, sáhttet go bargat gieldda buhcciidossodagas.
– Eat mii dárbbaš vuos veahki olggobealde gieldda. Jáhkán mis leat 5-6 buohccedivššára geaid mii sáhttit bivdit min veahkehit. Muhto min buohccedivššárat geat leamaš erremis, besset fas bargagoahtit farga, čilge sadjásaš sátnejođiheaddji Sylvi Johnsen.
Roassojođihangoddi lea bargamin
Sadjásaš sátnejođiheaddji Johnsen muitala sis lea dál roassojođihangoddi bargamin áššiin ja geavaha buot vejolaš resurssaid bissehit njoammudávdda leavvama.
– Mun ávžžuhan buohkaid čuovvut FHÁ dahje álbmotdearvvašvuođa instituhta rávvagiid mo eastadit njoammudávdda leavvama, bassat gieđaid giehtaspriittain, doallat earáide gaskka, ii luoitit eambbo go vihtta olbmo juohke doallodollui, rávve Porsáŋggu gieldda sadjásaš sátnejođiheaddji Sylvi Johnsen.
