Doala oktavuođa iežat bargiiguin ja jearat sis lea go mihkkege maid sii dárbbašit árgabeaivvis. Dá leat Bargobearráigeahču ráđit bargoaddiide geain leat bargit ruovttokantuvrrain.
– Dán earenoamáš dilis, mii sáhttá dál bistit oanehaš, mii ávžžuhit bargoaddiid ja bargiid bures ovttasbargat vai fárrolaga gávdnet buriid gaskaboddosaš čovdosiid, dadjá Bargobearráigeahču direktevra Trude Vollheim preassadieđáhusas.
Dohkálaš bargobiras ruovttus maid
Bargobirasláhka guoská maiddái gaskaboddosaš ruovttukantuvrraide.
– Lea dehálaš ahte bargoaddi čuovvula iežas bargiid, maiddái dalle go barget ruovttokantuvrrain. Dalle sáhttet fárrolaga gávdnat buriid čovdosiid nu ahte gáibádusat dohkálaš bargobirrasii vuhtii váldojit seammás go heiveha daid vejolašvuođaid mielde mat leat, sihke bargoaddi bealis ja bargi bealis, lohká Vollheim.
– Leat oallugat geat vuorjašuvvet go árgabeaivi lea rievdan, sihke priváhta ja barggu ektui. Dalle lea earenoamáš dehálaš ahte mii oaidnit ja beroštit nubbi nuppis. Lea maiddái dehálaš bidjat rájiid das ahte goas mii leat barggus ja goas mis lea friddja. Jus eat bija rájiid, de lea bahá ahte bargobeaivi ja friddjaáigi čađat gullet oktii, dadjá direktevra Vollheim.
Dá leat Bargobearráigeahču guhtta ráđi bargoaddiide geain leat bargit ruovttokantuvrrain:
Doala oktavuođa iežat bargiiguin ja ságastala singuin jeavddalaččat. Jearat maid sii dárbbašit bargoárgabeaivvis.
Gávnna ja šiehta digitála čovdosiid bargiiguin vai bargit sáhttet ieža gaskaneaset maid doallat oktavuođaid. Muhtun digitála ovdamearkkat leat Skype, Teams ja FaceTime.
Ásat dahje geavat sihke formálalaš ja eahpeformálalaš digitála čoahkkimiid. Gáfestala áinnas bargoustibiiguin digitálalaččat.
Fuolat ahte bargiin lea ergonomalaččat buoremus bargosadji, ovdamearkka dihte ahte bargiin lea buorre bargostuollu, buorre čuovga ja doarvái buorre dihtoršearbma. Jus lea bargi geas ii soaitte optimálalaččat heivehuvvon bargosadji, de sáhttet organisatoralaš doaibmabijut veahkehit dillái. Ovdamearkkat dasa leat molsašuhtti bargovuogit, doaibmabijut fysalaš aktivitehtaide, dávjjibut bottuid váldit ja nu viidáseappot.
Ávžžut bargiid váldit bottuid ja rievdadallat bargovugiid, ovdamearkka dihte ahte bargi rievdadallá bargobeavddi ja stuolu geavaheami.
Árvvoštala sáhttá go máškidis bargoáigi veahkehit bargiid hástalusaiguin dál go sihke skuvllat ja mánáidgárddit leat giddejuvvon.
