Buohkain lea oahpis njoammunbálgá.
Romssas ain leavvá njoammun ja maŋimuš jándora leat 195 koronaiskosa váldon. Dasa lassin leat guhtta ođđa duođaštuvvon njoammuma.
Maŋŋebárgga, suoidnemánu 20. beaivvi, duođaštuvvui njoammun ovtta bargis Lulli-Romssa buhcciidruovttus. Lea eahpesihkar leago bargi njoammudan earáid su bargosajis.
– Vaikke eanaš ássit ja bargit leat boahkuhuvvon, váldit mii iskosiid ja guorrat dilálašvuođa. Mii háliidat fuomášit vejolaš njoammuma vai sáhttit nu jođánit go vejolaččat ásahit doaibmabijuid, čállá Romssa suohkan sin neahttasiiddus.
Suohkanis leavvá ain korona ja sii muittuhit buohkaid válddihit iskosa jus leat dávdamearkkat, maiddái sii geat leat boahkuhuvvon.
Dál leat Romssas 37 olbmos duođaštuvvon Covid-19 ja 58 olbmo fas erremis dan dihte go leat lagasoktavuođat.
