UiT Norgga árktalaš universitehta ja Finnmárkku beanavuodjingilvvut guhkidit ovttasbargošiehtadusa golmmain jagiin. Finnmárkku beanavuodjingilvu lea dehálaš arena studeanttaid bargohárjehallamii.
UiT Norgga árktalaš universitehta ja Finnmárkku beanavuodjingilvvut guhkidit ovttasbargošiehtadusa golmmain jagiin. Finnmárkku beanavuodjingilvu lea dehálaš arena studeanttaid bargohárjehallamii.
UiT Norgga árktalaš universitehta rektor Anne Husebekk ja Finnmárkku beanavuodjingilvvu beaivválaš jođiheaddji Svanhild Pedersen leaba vuolláičállán ovttasbargošiehtadusa 2018-2020 áigodahkii.
– Finnmárkku beanavuodjingilvvut leat Eurohpá guhkimus beanavuodjimat ja guovllu stuorámus valáštallan- ja kulturlágideapmi. Mii háliidit joatkit ovttasbarggu go dat addá buori vuođu ovddidit universitehta dutkama ja oahpu Finnmárkkus. Mis leat maid seamma árvvut ja goappašagat leat dehálaččat Áltái ja olles Finnmárkui, dadjá rektor Anne Husebekk universitehta neahttasiidduide.
Dehálaš oahppoarena
UiT lea olu jagiid ovddidan sihke oahpuid ja dutkamiid Finnmárkku beanavuodjingilvvuid oktavuođas. Sihke bargit ja studeanttat lea áŋgiruššan.
– Ovttasbarggu bokte leat ásahan sierra oahpahusa beanavuodjimis, ja dat lea áibbas erenomáš fálaldat. Finnmárkku beanavuodjingilvu lea maid hirbmat dehálaš oahppobáiki studeanttaide, lohká Husebekk.
Maiddái Finnmárkku beanavuodjingilvvu beaivválaš jođiheaddji muitala iežaset duhtavažžan ovttasbargguin.
– Min ovttasbargu lea bures ovdánan maŋimuš jagiid. Midjiide lea dehálaš fállat oahpu studeanttaide ja seammás čađahit dehálaš bargguid, lohká Svanhild Pedersen.
