Boazodoalloláhkalávdegotti evttohus rievdadit boazodoallolága gulaskuddanáigemearri guhkiduvvo ođđajagimánu 5. b. 2023 rádjai.
Buot diehtojuohkinčoahkkimiin maid Sámediggi lea doallan boazodoalloguovlluin golggotmánus ja skábmamánus lea dieđihuvvon ahte gulaskuddanáigemearri lea menddo oanehaš.
Boazodoallit ja maiddái sámediggeáirasat lohket ahte boazodoalus leat olu barggut dán muttos áiggi ja ahte danin lea dárbu guhkidit gulaskuddanáigemeari. Sámediggeráđđi lea mearridan dán čuovvolit.
– Mii leat vuhtiiváldán boazodolliid máhcahagaid ja válljet guhkidit áigemeari. Lea hirpmus dehálaš ja viiddis dokumeanta mii galgá geahčaduvvot, ja dalle lea dehálaš ahte buot gullevaš bealit besset dárkilit geahčadit árvalusaid ja buktit cealkámušaid, dadjá sámediggeráđđi Hans Ole Eira (Gb) preassadieđáhusas.
Juovlamánu 14. beaivvi rádjái ledje dušše guokte gulaskuddancealkámuša boahtán. Sámediggi lea ožžon cealkámušaid maiddái diehtojuohkinčoahkkimiin, muhto sin mielas lea seamma dehálaš oažžut čálalaš cealkámušaid.
– Sámediggi háliida áššái nu olu cealkámušaid go vejolaš vai bargovuođđu lea viidát proseassas, ja dainna lágiin maid čájehit ipmárdusa boazodoalu bargodillái, loahpaha Eira.
