Kárášjoga gielda ja gieldda buollindoaimmahus deaivvadii čoahkkimis odne, ságastallat sierrašiehtadusaid birra. Čoahkkimis sohpe guhkidit šiehtadusa mánuin.
Kárášjoga gielda ja gieldda buollindoaimmahus deaivvadii čoahkkimis odne, ságastallat sierrašiehtadusaid birra. Čoahkkimis sohpe guhkidit šiehtadusa mánuin.
– Mii leat miehtan guhkidit sierrašiehtadusa gielddain guovvamánu 25. beaivvi rádjai, muitala Kárášjoga gieldda buollindoaimmahaga luohttevašolmmoš Kai Jøran Mienna.
Guovvamánu 25. beaivvi galgá gielda leat gearggus fállat ođastuvvon šiehtadusa buollindoaimmahussii. Mienna muitalii ievttá Ávviris iežaset leat cealkán eret sierrašiehtadusa gielddain, ja nu eai lean šat geatnegáhtton čáskadit dolaid jus buollá.
Dál go leat guhkidan dálá šiehtadusa, de jotket bargat nu mo dássážii leat dahkan. Mienna lohká iežas leat duđavaš maŋŋil otná čoahkkima.
– Jua, mii leat duđavaččat go vuhtiiválde min ja dolle čoahkkima. Boahtte vahkku galgá gielda midjiide ovdanbuktit plána das mo viidásat šiehtadallamat galget dahkkot, ja mánu geahčen galgat leat gergosat vuolláičállit ođđa šiehtadusa, lohká luohttevašolmmoš.
Jáhkká šaddat ovttaoaivilii
Ikte moittii Mienna gieldda go oaivvildii sin menddo njozet doaimmahit áššiid. Son čilgii maid iežaset cealkán eret šiehtadusa go eai lean duhtavaččat dan sisdoaluin. Šiehtadus ii leat ođastuvvon 2007 rájes.
Dál gal jáhkká iežaset šaddat ovttaoaivilii gielddain.
– Jua, dan mun gal jáhkán. Gal mii muhtin láhkai šaddat ovttaoaivilii. Ja dál gal jáhkán gieldda doaimmahišgoahtit min áššiid jođáneappot, lohká Mienna.
Luohttámušolmmoš dattege ii dáhto muitalit makkár beliid sii vurdet ođđa šiehtadussii.
– Dieid mii gal fertet váldit dađistaga. Mii galgat guovvamánu 25. beaivvi rádjai, máŋgii deaivvadit suohkana hálddahusain ja šiehtadallat áššiid birra. Mii fertet de oaidnit mo šiehtadusaiguin manná, lohká Mienna.
– Unohas
Kárášjoga ráđđealmmái Elfrid Boine, guhte maid lei otná čoahkkimis, lohká leat ilus go ášši dál orro čoavdašuvvamin.
– Ii leat áibbas buorre go eat leat čuovvolan ášši dalle go buollinveahka celkkii eret šiehtadusa, muhto lean hui ilus go dál leat bargamin áššiin, lohká Boine.
Son lohká leamaš unohassan go šiehtadus ii leat leamaš sajis.
Sáhttet bidjat vaikke gean doibmii
Buollinsihkkarvuođa direktoráhta ossodatdirektevra Anne Rygh Pedersen lohká dán ášši leat bargoriidun, danne direktoráhta ii seagut njuolgut áššái. Son dattege lohká ahte gielddat leat lága bokte geatnegáhtton doaimmahit buollin- ja gádjunbálvalusaid vaikke mo dal de leaš.
– Dakkár dilis gos buollinčáskadeaddjit celket eret šiehtadusaideaset gielddain, de sáhttá gielda geatnegahttit vaikke gean iežas ássiin, guhte lea ollesolbmoagis, buollinsuodjalussii bálvalussii, čilge Rygh Pedersen.
Buollindoaimmahusa váilevašvuođat fuolastahttet
Go gullá ahte ášši orro čielgamin de lohká dan leat buorren.
– Hui buorre, dalle ii dárbbaš gielda bidjat johtui hoahppodoaibmabijui, muhto liikká leat ain bealit maid gielda ferte čorget buollinsuodjalusa dáfus, muitala son.
Rygh Pedersen čujuha dasa go sin direktoráhtta borgemánus bearráigeahčat Kárášjoga buollindoaimmahaga, ja gávdne máŋga spiehkasteami.
– Gildii leat addán áigemeari guovvamánu 10. beaivvi rádjai, vástidit mo áigot njulget boasttuvuođaid maid gávnnaimet bearráigeahčus. Mii leat fuolastuvvon daid stuorra spiehkastemiid geažil mat gielddas leat buollindoaimmahaga dáfus.
Spiehkasteamit leat earret eará dat go gielddas váilo dokumentašuvdna das mo buollindoaimmahat lea organiserejuvvon, buollindoaimmahagas ii leat oktage nammaduvvon buollinhoavdda sadjásažžan, ii ge Kárášjoga buollindoaimmahagas gávdno dohkálaš vuogádat hárjehallamiidda.
