Nu lohká okta vuitiin Onroad Finnmárkku gilvvuid birra.
Nu lohká okta vuitiin Onroad Finnmárkku gilvvuid birra.
Jonas Gulsrud, gii vuittii dievdoluohká 20 jagis 39 jáhkkái, ja obbalaččat bođii njealjádin, muitala gilvvut leat guhkit ja sáhttá vaikke makkár dálki leahkit.
– Dán jagi lei nu fiertu ja beaivvádat ahte bullen, ja Porsáŋgguvuotnagátti ges dakkár miehtebiegga ahte jalggas lei leahttu birrasiid 50 kilomehtera diimmus. Go de mohkkasii fas Álttá guvlui de lei ges dat vuostebiegga, ja orui oba guhkki molli, muitala Gulsrud.
Son lohká diibmá lei ges čoaskkis ja lei issorasat váiban go joavddai mollii.
Joavkkuin searvat nuppes
Gulsrud lohká lea duhtavaš vuoitit individuella gilvvu, ja sávvá boahtte jahkái gártát eanet gilvaleddjiid Kárášjoga sihkkelsearvái, vai besset searvat sihkkelasten gilvvuide Onroad Finnmárkkus.
– Ledjen diibmá mielde joavkkus, ja bođiimet nubbin, nu ahte joavkkuin olahit bohtosiid lea hui duhtadeaddji, lohká Gulsrud.
Váilevaš báikkálaš oasseváldit
Onroad Finnmárkku beaivválaš jođiheaddji ja gilvvuid ovddasvástideaddji Jørund Greibrok lea duhtavaš gilvvuiguin, muhto oaivvilda go dát gilvvut leat dego ovdagilvvut Offroad Finnmárkui, de sáhttá vuohttit váilevaš oasseváldiid erenoamážit Álttá bealis.
– Mii leat ožžon máhcahemiid olbmuin ahte áigot vuoruhit Offroad Finnmárkku ovdalii, ja šaddá beare ollu sihkkelastin oasseváldiid bearrašiid dáfus jus galget goappašagain leat mielde.
Sirdit áiggi goas lágidit
Danne áigotge lágideaddjit árvvoštallat sirdit gilvvuid áigodaga.
– Mii leat jurddašan árabut bidjat nu ahte ii leat nu lahka Offroad Finnmárkku áiggi dáfus. Leat maiddái jurddašan ahte sáhttit oktanis lágidit dán guokte gilvvu, lohká son.
Beare guhkes gaskka lágidemiin
Jonas Gulsrud mielas ges lea beare guhkes gaska dán guovtti gilvvus.
– Onroad lea álggus suoidnemánu ja Offroad ges álggus boahtte mánu. Lean goappešagagin mielde ja dál šaddá váttisvuohtan goas galgá luomu váldit. Go lea nu guhkes gaska gilvvuin, de ii sáhte luomu váldet daid gaskas go ferte han hárjehallat Offroad Finnmárkkui maid, nu ahte lean maŋidan luomu maŋŋel Offroad Finnmárkku, lohká son.
Gulsrud livčče háliidan ahte livčče oanit gaska dain gilvvuin.
– Vahkku dahje guokte vahkku gaskka gilvvuin livčče vuogas. Oktanis gal ii livčče nu buorre, midjiide geat háliidit goappeš gilvvuin oassálastet, lohká son.
