Juohke goalmmát olmmoš geas lea leamašan dárbu psyhkalaš dikšumii vásiha ahte ádjána badjel mánu oaččut veahki. Almmolaš dearvvašvuođalágádusain leat guhkimus vuordináiggit, gaskamearalaččat čieža vahkku.
Dát boahtá ovdan dutkamis man Respons Analyse lea čađahan buhtadusfitnodaga Fremtind ovddas. Das čajehuvvo maiddai ahte maŋemus guokte jagi lea juohke goalmmát norgalaš lea dárbbašan professionálas veahki psyhkalaš bártit geažil. Dasa lassin bártidit nuoramusat eanemusat.
– Dat lea dehálaš árrat álgit dikšut vuoi sii geat bártidit eai galgga oaččut vearrát dili, ja vai sii eai dárbbaš buohccindieđihit. Mii diehtit ahte psyhkalaš bárttit sáhttet mielddisbuktit buohccindieđiheami, ja ahte loahpas ii sáhte šat bargat, lohká Grethe Holltrø, gii lea Fremtinda olbmuid- ja eallinbuhtadusaid jođiheaddji.
Guhkimus vuordináiggit almmolaš dearvvašvuođalágádusain
Dušše 12 proseantta vástidit ahte leat priváhta bálvalusaid bokte ohcan veahki, ja 14 proseantta ges ohce sihke priváhta ja almmolaš bálvalusaid bokte veahki. Priváhta bálvalusain lei vuordináigi gaskamearalaččat vihtta vahkku. 4 proseantta dieđihedje ahte eai obanassiige ohcan veahki.
Dát vástádusat čájehit ahte leat stuora erohusaid gaskal riikaosiin. Agder fylkka ássit vástidedje ahte vuordináigi lei golbma vahkku, ja Romssa ja Finnmárkku ássit vástidedje ahte šadde vuordit gávcci vahkku.
Duođalaš sidjiide geat leat hearkkis dilis
Bohtosat sulastahttet Riksrevisjonen raporta, mii almmuhuvvui diibmá geasset. Das bođii ovdan ahte oallugat geat dárbbašit psyhkalaš veahki šaddet guhká vuordit, ja ahte eai leat seammalagán dearvvašvuođafálaldagat olles riikkas. Raporta govvida ahte lea moaittehahtti ja duođalaš dilálašvuohta, earenoamažit olbmuide geat juo vásihit bártit.
Psyhkalaš dearvvašvuođa ráđi generálačálli Tove Gundersen lohká jahkehahttin ahte bárttit vearáskit jus olmmoš ii oaččo árrat veahki. Gundersen lohká ahte dát guoská earenoamažit nuorra olbmuide, go sidjiide čuhcet vuordináiggit eambbo go rávis olbmuide.
