Ođđa iskkadeapmi man NAF lea čađahan duođašta ahte juohke goalmmát olmmoš ii oastte elbiilla guhkes láddenáiggi dihte. Nils Sødal, gii lea NAF gulahallanráđđeaddi, muitala ahte guhkes láddenáiggit ja váilevaš johtilláddenvejolašvuođat leat ákkat manne olbmot eai oastte el-biillaid.
Váldosivva dasa manne olbmot eai oastte el-biilla lea goitge go el-biillain lea dávjá oanehaš olámuddu. Guokte goalmmadasoasis olbmuin válljejit ahte eai oastte el-biilla dán dihte. Dasto lea nubbin stuorámus sivva dat ahte el-biillain lea guhkes láddenáigi, ja ahte ii sáhte láddet biilla ruovttus iige barggus.
– Mis lea politihkalaš mihttu ahte 2025 rájes vuovdigoahtit dušše biillaid mat eai nuoskkit. Jus mii galgat dan olahit, de leat váilevaš láddenstašuvnnat ja jođánis ládden čuolmmat maid mii fertet čoavdit, lohká Nils Sødal.
Olbmot ostet baicca adnon bensiidna- ja dieselbiillaid
Sødal deattuha maid ahte el-biillaid haddi lea hástalus man háliidit čoavdit. Juohke goalmmát olmmoš dieđiha ahte lea beare divrras oastit el-biilla.
– Dábálaš olbmot, geat leat dehálaččat ođđa ráđđehussii, ostet baicca adnon biillaid. Njeallje viđadasoassi biillain mat vuvdojuvvojedje diibmá ledje adnonbiillat. Dasa lassin ii gávdno vel adnonbiilamárkan el-biillaide, ja lea olu váddasit oastit el-biillaid main lea guhkes olámuddu go bensiidna- ja dieselbiillaid, dadjá Sødal.
– Lea dehálaš ahte ođđa ráđđehus sihkku adnon el-biillaid divatlassáneami. Lei vahát go Solberg-ráđđehus bijai divatlassáneami stádabušeahttaevttohussii. Mii oaidnit maiddái ahte lea beare árrat álgit bidjat momssa el-biillaide boahtte jahkái, oaivvilda Nils Sødal, gii lassin čujuha rehkenasttimiidda maid NAF ja Birasdirektoráhtta leat čađahan, mat duođaštit ahte el-biila ii leat gilvovuoimmálaš vearrovuoittuid haga ovdal go 2024:s.
Iešguđetlágan hástalusat miehtá riikka
Riikkas gávdnojit iešguđetlagán hástalusat el-biilla oastima ektui. Stuorámus hástalus Davvi-Norggas leat váilevaš johtilláddenvejolašvuođat. Davvi-Norggas oaivvildit bealli olbmuin ahte dat lea sivvan manne eai oastte el-biilla. Muđui lea olámuddu hástalus mii čuožžila miehtá riikka.
– Iskkadeapmi duođašta ahte el-biilamárkan ii leat ollislaččat láddan Norggas. Dan geažil eat sáhte vuordit ahte vuovdigoahtit nu olu el-biillaid juste dál, muhto lea goitge dárbu sihke ávžžuhit olbmuid oastit el-biillaid ja láhčit dili dasa ahte leat nohkka láddenvejolašvuođat miehtá riikka, loahpaha Sødal.
