Lávvardaga gudnijahttet Liv ja Øyvind Rundberga «Puls Lyngen» doaluid oktavuođas. Soai leaba váhnemat dovddus sámi musihkkáriidda, ja ovttas mánáiguin lávkeba buolliseara guovttos lávdái.
Liv Rundberg lea áŋgiris kulturbargi ja su isit Øyvind Lindberg lea buollisearra valáštallandoaimmain Davvi-Romssas. Dán dáhtot «Puls Lyngen» kulturdoaluin čalmmustahttit. Lávvardaga konsearttas dáhtot gudnijahttit gáivuotnalačča guovtto áŋgiruššama. Framtid i Nord aviisa čállá dán ášši.
Buorit ovdagovat
– Liv ánssáša gudni go lea ovddidan kultureallima Davvi-Romssas, oažžu lohkat olles fylkkas. Mii rámidit olbmuid geat eallima bokte addet earáide buriid vásáhusaid. Buot Rundberg bearašláhttut leat buorit ovdagovat, muitala «Puls Lyngen» booking- ja artisttaovddasvástideaddji Kåre Bjørnar Olsen.
Olles bearaš lávdái
Liv ja Øyvind leaba váhnemat Rundberg vieljažagaide geat čuojahit Violet Road joavkkus, sudnos lea maid nieida, Herborg Rundberg, gii bargá musihkain ja maiddái ovddida sámi musihka. Eadni muitala ahte buohkat lávkejit lávdái lávvardaga.
– Mánáin galgá maiddái kultuvrralaš ovdanbuktin. In jáhke olles bearaš leamaš seamma lávddis oktanaga beare máŋgii. Mii leamaš Islánddas koarratuvrras ja oktii čuojaheimmet Guovdageainnus beassášfestiválas. Šaddá suohtas go olles bearaš dahká juoga ovttas, dadjá Liv Rundberg Framtid i Nord:i.
Liv ja Øyvind njeallje bártni čuojahit beahkkán Violet Road joavkkus. Preassagovva: Knut Aaserud
Illuda sakka
Liv Rundberg mielas lea sakka illudahti go gudnijahttet su barggu.
– Mu mielas lea njuorasmahtti ja hávski go jurddašit nu go dahket. Lea maid erenomáš suohtas go gudnijahttet mu Ivgus, dadjá Liv geas lea nana oktavuohta ránnjásuohkanii. 1970-logus lávii son luoikkahit Ivgu girku orgela.
– Lávejin čuojahit girkoorgela dan botta go Håkon lávii stoahkat smávvabiillaiguin láhttis. Dan rájes lean máŋgii leamaš doppe orgelčuojaheaddjin ja lean maid ovttasbargan báikkálaš koarran, čilge son.
Dáhtot jahkásaččat gudnijahttit
Nu guhká go «Puls Lyngen» fal oaidná beaivečuovgga maiddái boahtte áiggis, de dáhtot gudnijahttit soapmása geas lea mearkkašupmi Davvi-Romsii.
– Mii vuosttildit polariserema ja fápmofáktora, danin dáhtut botket suohkanrájáid ja bovdet eará suohkaniid oasálastit. Mis lea maid dáhttu boahtte áiggis gudnijahttit sin geat eai gula min suohkanii, muitala Olsen.
