Gudnejáhtton 500 duháhiin

Juohke jagi juohká Per Gannevik vuođđudus bálkkašumiid dáiddáriidda geain vurdet leat mearkkašumi ruoŧa kulturárbái. Bálkkašupmi addo viđa dáiddárii govva-, hábmen-, musihkka-, teáhter-, filbma- ja dánsadáiddasuorggis. Sákkaldatgovvadáiddár Britta Marakatt-Labba lei okta dan vihttasis geat ožžo 500 duhát ruođaruvnnu guhtege.

 – Mun hirpmahuvven, in lean vuordimin dákkár bálkkašumi oažžut. Sámekultuvra ii leamaš nu oidnosis Ruoŧas, muhto dál orrot fuomášišgoahtán min maid, dadjá Marakatt-Labba ja lohká leat stuorra gudnin oažžut dán bálkkašumi.

Gannevik-stipeanda lea okta ruoŧa stuorámus kulturbálkkašumiin, dát juhkkui vuosttaš geardde 2012:s.

 – Su muitalusat leat monumentálat ja dárkilat seammás. Sákkaldagat dávjá gávdnojit almmolaš birrasiin dego universitehtain ja girkuin, muhto hábme liikká dáidaga mii lea lahka geahčči. Giehtadáidduin ja ivdneválljemiin hábme Britta Marakatt-Labba dáidaga sámi historjjá ja dálá áiggi birra, koloniserema ja badjelmearálašvuođa birra, čuovgga ja seavdnjadasa ja luonddu ja olbmo

hearkivuođa birra, ákkastallá jury Konstnarnämdnen siiddus.

–Illá jáhkken

Ieš dáiddár muitala ožžon diehtit dán birra jo njukčamánus.

 – Álggos go muitaledje ahte lean ožžon dán bálkkašumi ja ahte lea 500 duhát, de in nagodan jáhkkit ge ja fertejin jearrat ahte lea go duohta, čilge Marakatt-Labba Ávvirii.

Álggii 78:s

Son álggii sákkaldatgovaid ráhkadit 1978:s go lei Gøteborgga hábmen- ja dáiddaallaskuvllas.

 – Mus ledje dat muitalusat iežan siste dalle jo ja geahččalin feara makkár surggiid bokte ovdanbuktit daid, njuhten, grafihkaid ráhkadin ja lávejin gođđit, muhto in orron lihkostuvvamin oažžut ovdan muitalusaid nu mo háliidin.

Oktii son dattege lei báidnimin láiggiid maiguin áiggui gođđit.

 – De fuomášin ahte mun sáhtán sággat daid beallemasávdnasii. De dego gávdnen iežan suorggi. Dál go buohtastahttán dalá govaid dálá govaiguin de oainnán ahte lean šaddan čeahpit ja sihkkarat dán dáidagis.

Britta lohká maid alddis leamaš oahpaheaddji, Elsa Agélii, guhte movttiidahtii su bargat sákkaldatdáiddárin.

 – Ja son lea čeahpes pedagoga maid. Son lea hui rabas olmmoš ja čeahppi oahpahit. Dat attii munnje liigemovtta bargat dáinna surggiin, muitala Britta.

–Hárjánan seastit

Dáiddár ii loga iežas vuos diehtit masa galggaš ruđa geavahit.

 – Mii dáiddárat leat hárjánan ahte sisaboahtu ii leat nu sihkar, nu leat hárjánan seastit. Nu ahte ferten ruđaid bidjat báŋkkui dassážii go fuomášan maid dagan, čilge son.