Vuossárgga almmuha suodjalusministtar Frank Bakke-Jensen almmolaččat rádjeofelaččaid muitobácci Divttasvuonas.
Okta dain eanemus geavahuvvon báhtaranbálgáin Norggas Ruŧŧii lea Divttasvuona gielddas. Lea rehkenaston ahte birrasii 3000 báhtareaddji vázze dan bálgás jagi 1940 rájes gitta 1945 rádjai. Eanaš báhtareddjiin dárbbašedje veahki báikeolbmuin beassat dorvvolašvuhtii. Sámi rádjeofelaččat, sin bearrašat ja Divttasvuona ássit vásihedje unohisvuođaid máŋgalogi jagi maŋŋel soađi, dan dihte go serve vuostálastinbargguide soađeáiggis.
– Moadde sápmelačča Divttasvuonas veahkehedje olusiid dorvvolašvuhtii. Sin bearrašat ja divttasvuotnalaččat veahkehedje ja dorjo báhtareddjiid. Dan barggu ovddas de ánssášit gudni ja giitevašvuođa. Divttasvuona rádjeofelaččat čađahedje dehálaš barggu olbmuide geat ledje heađis go Norga lei okkuperejuvvon, dadjá suodjalusministtar Frank Bakke-Jensen. preassadieđáhusastis.
Dehálaš čalmmustit
Muitobázzi Måsske Divttasvuona suohkanis lea muitun ja giitun sámi báhtaranofelaččaide nuppi máilmmisoađi oktavuođas.
– Áigevihtanat leat vádjolan ja dan dihte lea dehálaš ain áimmahuššat historjjá. Mii dárbbašit dákkár čalmmustemiid muittuhan dihti ahte gánnáha suodjalit árvvuid, dadjá Frank Bakke-Jensen.