Beannot vahkku geahčen lágiduvvo Saami Ski Race čihččet geardde, ja dán jagi rájes juhket silbabasttiid Jon Meløy rohki muitun.
Beannot vahkku geahčen lágiduvvo Saami Ski Race čihččet geardde, ja dán jagi rájes juhket silbabasttiid Jon Meløy rohki muitun.
– Jon Meløy rohki searvvai buot guhtta Saami Ski Race čuoigamiidda maid dán rádjai leat lágidan, danne háliidat su muitun juohkit silbabasttiid buohkaide geat leat guđa geardde čuoigan 90 kilomehter luohkás, muitala čuoigamiid jođiheaddji Sara Ellen Anne Eira.
Su vuoiŋŋa mielde
Guovdageainnu Valáštallan Searvi ja FeFo dat ovttasráđiid leat hutkan dán gudnejahttima, mii šaddá jahkásaš dáhpáhussan. Silbabasttiid áigot oainnat juohkit juohke jagi daidda geat leat guhtta geardde čuoigan 90 kilomehtera Saami Ski Race čuoigamiin.
Bastte sáhtát maid máŋgii oažžut, go sii geat dán jagi ožžot sáhttet fas guđa jagi geahčen oažžut ođđa basttiid jus ain jotket searvat čuoigamiidda.
– Jovnna lei áŋgir lihkadit, ja dáinna čájehat su vuoiŋŋa, nammalassii ahte man dehálaš lea lihkadit ja geavahit rupmaša. Dáinna nannet maid álbmotdearvvašvuođa, lohká Eira.
Govven: Saami Ski Race
Eliassen juohká basttiid
Saami Ski Race lágiduvvo čihččet geardde lávvardaga cuoŋománu 9. beaivvi.
– Beakkán guhkesgaskkaidčuoigi Petter Eliassen lea dieđihan searvat, ja mii sávvat sihke ođđa ja ovddeš oassálastiide buresboahtima duoddara čábbámus čuoiganvásáhussii, muitala Sara Ellen Anne Eira.
Beakkán Eliassen dat galgá ge geiget silbabasttiid áŋgireamos čuigiide.
Nuppástuhttin buktán ođđa bargguid
Dán jagi čuoigalit Guovdageainnus, moalla ges lea Heahtás Enodagas. Sihke dán jagi ja boahtte jagi lea vuolgga Guovdageainnus, 2018 jorgaluvvo fas čuoigan, dalle lea vuolgga Heahtás ja moalla lea de ges Guovdageainnus. Dát lea buktán ođđa hástalusaid lágideddjiide.
– Mii leat hárjánan ráhkkanit vuostáiváldit čuigiid, dál galget ges min luhtte čuoigalit ja de šaddat eará ládje ráhkkanit, muitala Sara.
Maiddái láhttu leat rievdadan veaháš, nu ahte garvet eanaš jávrriid.
Premierejit maiddái 60 km oasseváldiid
Dasa lassin lea dán jagi ođas vel go premierejit maiddái 60 km luohká čuigiid. Golbma sávrrimus nissona ja dievddu ožžot ruhtavuoittuid. Guovdageainnu IL čuoigi Håvard Klemetsen searvá ge 60 km luohkkái.
– Mii háliidat loktet árvvu dán luohkás. Go guhtta miilla leat čuoigan de leat oalle guhkás čuoigan, danne ožžot sii maid vuoittuid, čilge jođiheaddji.
Unnit oasseváldit go diibmá
Nu mo dábálaččat de leat golbma luohká maidda sáhttá searvat; 90 kilomehter gilvvohallanluohká mas lea vuolgga Guovdageainnus, 60 kilomehterčuoigan mas lea vuolgga Sihččajávrre-luoddaearus (3 miilla lulábealde Guovdageainnu) ja 30 kilomehterčuoigan mas lea vuolgga Neahkilis Suoma bealde.
Dán rádjai leat dieđihan birrasiid 170 čuoigi.
– Dat lea unnit go diibmá, erenoamážit leat unnit olbmot dieđihan 30 kilomehterčuoigamiidda, vaikke dán luohkás lávejit olu oasseváldit. Mii jáhkkit dán earret eará boahtit das go čuoigan lea jorgaluvvon, ja báikki olbmot eai soaitte háliidit čuoigat Suomas, čilge Saami Ski Race jođiheaddji Sara Ellen Anne Eira.
Dieđihanáigemearri lea cuoŋománu 6. beaivvi, muhto cuoŋománu 1. beaivvi rájes divru dieđiheapmi. Danne berret ge dál doapmat dieđihit jus leat jurddašan čuoigat.
