Mari Boine oaččui Spellemannbálkkašumi gudnebálkkašumi sotnabeaivvi eahkedis.
Mari Boine oaččui Spellemannbálkkašumi gudnebálkkašumi sotnabeaivvi eahkedis.
Ieš ii diehtán ahte lei nammaduvvon bálkkašupmái, go de čurvejedje su nama.
Son oaččui bálkkašumi go lea okta dain dovdoseamos sámi artisttain ja lea badjel 30 jagi doaibman artistan.
– Ollu giitu, dál ipmirdan ahte in lean nammaduvvon fiinna popskearru ovddas, logai Mari Boine ja giitalii sihke ovttasbargoguimmiid ja bearraša.
Maŋŋel go lei ožžon bálkkašumi, de bođii ISÁK joavku ja čuojahii «Elle» lávlaga man Mari Boine ráhkadii 1852-stuimmiid filbmii mii ilmmai 2008:s.
Ollu allaárvosaš bálkkašumiid ožžon
Son lea golmma geardde ovdal ožžon Spellemannbálkkašumi rabas luohkás, ja dál beasai váldit vuostá gudnebálkkašumi.
Dasa lassin lea son ožžon máŋggaid bálkkašumiid iežas musihkalaš áigodagas.
Áillohaš-bálkkašupmi, Davviriikkaid ráđi musihkkabálkkašupmi, Sámeráđi gudnebálkkašupmi namuhan dihte soames. Maiddái Gonagas Harald V lea nammadan Boine St. Olav Ortnega 1. klássa riddarin go lea nu «máŋggabealat dáiddalaččat doaibman».
