Deanu heaibuidsearvvi Signe Marie Fidje Store lea birgetmeahttun. Son lea fasken buot vejolaš golliid Norggameašttirgilvvuin main lea oasálastán, mannan vahkkoloahpa vuittii guđát NM-golli.
19-jahkásaš Signe Marie Fidje Store vuittii ikte vuot golli Norgga junior meašttirgilvvuin.
– Dá lea su guđát gollemedálja, son birge duođaid bures, čállá Deanu heaibuidsearvi iežaset neahttasiiddus.
Guokte Deanu heaibu
Dán jagi lágidii Toro IF Norgga junior meašttirgilvvuid. Deanu heaibuidsearvvi ovddastii Signe Marie Fidje Store 67-kilosaš nissonluohkás ja Gunn Rita Boine ges 63-kilosaš joavkkus. Gunn Rita ii birgen beare bures, son vuoittahalai buot heaibumiin.
6/6 vejolaš golli
Signe Marie birgii sakka buoret, eai ge sus lean stuorebuš hástalusat go čájehii gii lea buoremus juniora Norggas. Son oasalastii vuohččan junior NM:s 14-jahkásažžan, dalle faskii jo deatnulaš golli. Son lea 2010 rájes vuoitán guhtta NM-golli.
– Lea hirbmat máidnodáhkku go Signe vuoitá guhtta golli guđa vejolaš NM-gollis. Dan eai dáidde oallugat dahkan Norggas. Go geahčada Signe Junior NM bohtosiid, de ii leat son ovtta ge čuoggá manahan gilvaleaddjái. Su čuoggábohtosat čájehit 55-0, buorebut ii dáidde sáhttit šaddat, čállá Deanu heaibuidsearvi.
Ávvir lea geahččalan váldit oktavuođa NM-vuitiin, muhto son ii leamaš telefuvnna bokte olámuttos. Signe Marie Fidje Store lea maŋimuš juniorgilvvuin oasálastán, go boahtte jagi lea son seniorheaibu.
Signe Marie Fidje Store searvvai vuosttaš gearddi junior NM:i 2010:s, dalle jo vuittii son golli. Deanu heaibuidsearvvi govva.
