Guđas logi oahppis Oslos lohket iežaset oahppan unnit go lei ruovttuskuvla koronaheahtedilis. Dat vuorjá Oslo skuvlagávpotráđi.
12 000 nuora, gaskal 13- ja 19-jahkásaččat, oassálaste dutkamii, mii lea čađahuvvon Velferdsforskningsinstituttet NOVA Oslo Metas ovdal go skuvllat fas rahppojedje cuoŋománus ja miessemánus.
Sullii bealli lei duđavaš vehkiin man ožžo oahpaheddjiin. Muhto juohke njealját oahppi lei njulgestaga duhtameahttun oahpahusain. Dutkamis maid čájehuvvo ahte oahppit geat bohtet alit sosiálalaš dásis lihkostuvve buorebut ruovttuskuvlemis go sii geat leat vuolit sosiálalaš dásis ja nuorat geain lea sisafárrenduogáš.
– Lea čielggas ahte njulges oktavuohta mii oahppis lea oahpaheddjiin ii sáhte buhtaduvvot digitála oahpahusas, dadjá dutkii Oslo Met:s Anders Bakken NRK:i.
– Veaháš baluin
Oslo skuvlagávpotráđđi Inga Marte Thorkildsen (Sosialisttalaš Gurutbellodat) dadjá ahte leat ollu oahppit geat eai ožžon seamma oahpahusa man ožžo ovdal.
– Nu mun čohkkán veaháš baluin, erenoamážit daid ohppiid dihte geain lea lossa dilli ruovttus, dadjá son.
Son lohká gieldda guorahallat dilálašvuođa vai ožžot obbalašgova mo ruovttuskuvla lea doaibman ohppiide.
– Mii beroštat oažžut olggobeale dutkama ja mii leat ieža jearahallan ižeamet bargiid, ohppiid ja váhnemiid mo sii leat vásihan ruovttuskuvlema, čilge son.
Oktiibuot leat 65 000 oahppi Oslo vuođđoskuvllain.
Giddejuvvon goasii guokte mánu
Duorastaga njukčamánu 12. beaivvi mearridii ráđđehus daid buot radikálamus doaibmabijuid Norggas nuppi máilmmisoađi rájes. Okta doaimmabijuin lei giddet riikka skuvllaid ja mánáidgárddiid bearjadaga njukčamánu 13. beaivvi.
Dasto fertejedje oahppit joatkit giđđaoahpahusa ruovttus, ja oahpaheaddjit dolle gáiddusoahpahusa.
Cuoŋománu 27. beaivvi rahppui skuvla 1.–4. luohkáide. Miessemánu 11. beaivvi rahppui skuvla eará luohkáide, ja miessemánu mielde ledje skuvllat fas rahppon.
©NTB
