Sámi nieida Ánne Biret Holmestrand ja su joavku NTNUI leat Eurohpá guđádin buoremus studeantajoavku futsal nammasaš spábbačiekčamis.
Studeanta Eurohpameašttirgilvu lei Bragas, Portugalas ja NTNUI joavku časkkáhalai njealjádasfinálas Duiskka jovkui, Münsterii. Dan maŋel sii čikče vel guokte čiekčama mearridandihte galládin sii šaddet Eurohpameašttirgilvvus.
Álggos deaivvadedje Portugisa Minho universitehtain. Dán čiekčamis šattai boađus 2-2 ja Holmestranda joavku vuittii ráŋggáštusčievččastagain gilvvu 9-8. Nu besse sii čiekčat Ruošša Ural joavkku vuostá.
Okta oiddohiin
Ural lei ovdagihtii okta oiddohiin vuoitit olles gilvvu, ja NTNUI nieiddat čállet ge iežaset Fácebook siiddus ahte Ural lei okta dain buoremus joavkkuin maid goassege leat deaivan.
NTNUI lei vuoittubealde 4-1dassái čiekčamis lei vel báhcán sullii 10 minuhta. De jorgalii Ruošša joavku čiekčama. Sii báhče 4 moala ja vuite 4-5.
– Dat manai buorebut go leimmet doivon, go dáppe ledje hui buorit joavkkut. Ja mii birgiimet bures juohke čiekčamis, čállá Ánne Biret Holmestrand Messengeris Ávvirii.
