Go birasaktivista oaččui 30 000 euro bálkkašumi suopmelaš fitnodagas, de válljii son ruđaid skeŋket Suoma sámenuoraid dálkkádatbargui.
Nu čállá Yle Sápmi.
Niemi Palvelut Oy fitnodat dat geige nuppes Maailmanmuuttaja-bálkkašumi. Bálkkašumi geigejit olbmui gean oaivvildit nuppástuhttán máilmmi. Dán vuoru lei Greta Thunberg gii bálkkašumi oaččui.
Thunberg lea beakkán dálkkádataktivista Ruoŧas eret. Go bálkkašumi oaččui, son válljii dan geiget viidáset Suoma Sámi Nuorat -searvvi dálkkádatbargui. Searvi lei Anáris ávvudeame 30 jagi doaimma go gulle Thunberg skeaŋkka birra. Yle Sápmi čállá Thunberg celkkii dearvvuođaid sámenuoraide video hámis.
– Munnje lea stuorra gudni oažžut Maailmanmuuttaja-bálkkašumi. Lean ilus das ahte bálkkašumi ruđat mannet Suoma Sámi Nuorat -searvvi doaimmaid doarjumii. Eamiálbmogat miehtá máilmmi gártet ovddemužžan deaividit dálkkádatnuppástusa váikkuhusaiguin, ja sii maiddái barget dan eastadeami ovdii. Danin návccaid bidjan sin bargui ja árbedihtui lea seamma go dálkkádaga suodjaleapmi, dajai Thunberg videodearvvaheamis.
Suoma Sámi Nuoraid searvi lea giitevaš.
– Dálkkádat lea midjiide seamma go boahttevuohta. Háliidan deattuhit dan, man dehálaš lea ahte sámit dovddastuvvojit ja besset ain eanet oassálastit dálkkádatságastallamii, lohká Suoma Sámi Nuorat searvvi ságadoalli Petra Laiti.
