Grammy nammaduvvon ráppár Riddu Riđđui

Ana Tijoux bajásšattai politihkalaš eksiillas Fránskariikkas, dan botta go Chiles lei siskkáldassoahti. Tijoux čuoččuha hip-hopa addán sutnje su kultuvrralaš identitehta, mii sus eará muđuid lei váilot go ii bajásšaddan iežas ruovtturiikkas.

– Hip-hop lea riikkahis olbmuid riikka, lohká Tijoux ja dat govve makkár oktavuohta sus lea hip-hop kultuvrii.

Rámis

Ana lea 2007 čieža rájes huksen iežas solokarrieara teavsttaiguin unnitloguálbmogiid vealaheami birra, olmmošvuoigatvuođa rihkkumiid birra ja sosiála erohusaid birra, čállá festivála preassadieđáhusastis.

Son lea máŋgii nammaduvvon Grammy bálkkašumiide, man álkit sáhttá gohčodit máilmmi beakkáneamos musihkkabálkkašupmin. Anas lea maid lávlla mielde beakkán «Breaking Bad» tv-ráiddus.

Festiválajođiheaddji Karoline Trollvik lea rámis:

– Mii leat nu máilmme rápmásat dáinna bookingain. Ana Tijoux lea leamaš bajimusas min sávaldagaid searvvit máŋggaid jagiid jo! Dát lea albma čaffadis nisu, guhte geavaha musihka vearjun čalmmustahttit unnitloguálbmogiid ja álgoálbmogii duostilis ja universála vugiin. Su musihkka bidjá olbmo sihke dánsut ja smiehtadit.

Rockas hiphop

Politihkalaš teavsttat mat leat seaguhuvvon rockavuođđuduvvon hip-hopain, leat dagahan ahte Johkamohkkilaš ráppára Kitoka birra daddjo ahte lea «Beastie Boys ruoŧagillii». Dát artista lea dađistaga duostan váldit ovdan stereotypiijaid ja ovdagáttuid mat leat sámevuođa vuostá. Kitok iige bala iežas birra muitaleames, su teavsttain lea sihke frustrašuvdna, suhttu ja hearkivuohta.

– Ráhkkan ovtta Sámi eanemus eksplosiiva vásáhusaide, dadjá Trollvik Kitoka birra.

(Ášši joatká gova vuolábealde)

Arktalaš supernásti

Sámi ráppár SlinCraze bargagođii musihkain ja ráppain 14 jahkásažžan. Su teavsttat govvejit makkár sápmelačča eallin sáhttá leat, eallin gos deaividat sihke ovdagáttuiguin ja rasismmain. SlinCraze ovddida ráfi, ráhkesvuođa ja dohkkeheami, makkár oskui, kultuvrii dahje sodju dal de leaš.

– Mun jáhkán hip-hop lea mielde ovddideames álgoálbmotáššiid dan vuogi geažil mainna mii ovdanbuktit, mii leat čaffadat, garrasit dadjalat eat ge beroš maid earát dal jurddašežžet dan birra, dadjá SlinCraze.

Lassin konsertii de Ridduguossit besset vásihit SlinCraze Northern Soul diŋgojuvvonbihtás, ja áibbas ođđa dokumentáras su birra; «Arctic Superstar» mii lea oassin dán jagáš Riddu filbmaprográmmas.

Árvvus adnojuvvon neahttabáki Vice, lea bidjan dán filmma listui mas leat logi musihkkadokumentára maid oaivvildit olbmuid fertet geahččat 2016:s.