Fuođđokamera lea govven gumppe go borrá sávzaráppi, Lierne suohkanis Davvi-Trøndelágas. Lea hárve ahte duođastuvvo gumpe fylkkas.
Fuođđokamera lea govven gumppe go borrá sávzaráppi, Lierne suohkanis Davvi-Trøndelágas. Lea hárve ahte duođastuvvo gumpe fylkkas.
Gumpe lea govvejuvvon čakčamánu 10. beaivvi dán jagi, Østre Brandsfjell nammasaš váris, fuođđokamerain mii gullá Norgga Luonddudutkaninstituhttii (NINA), dieđiha Rovdata.no.
Dutkan
NINA ja Nord universitet geavahit fuođđokameraid dutkat movt meahcceeallit dahket boraspiregoddon ráppiiguin, ja dán háve lei kamera biddjon ovtta sávzaráppi lusa man guovža lei goddán.
Vánddardit viidát
Vaikko lea hárvenaš ahte gumpe duođaštuvvo Davvi-Trøndelágas, de ii leat hirpmahuhtti ahte gumppet oidnojit olggobealde iežaset lunddolaš eallinguovlluid Skandinávias.
– Gumppes leat jáhkkemeahttun vánddardannávccat ja sáhttá mannat čuđiid kilomehteriid. Teorehtalaččat sáhttet ihtit vaikko gos, čilge Rovdata jođiheaddji Jonas Kindberg.
Dehálaš gumpegoziheapmái
Son lohká olbmot sáhttet dákkáraš dieđihemiid bokte addit dehálaš oasi gumppiid goziheapmái Norggas. Dan sáhttá dahkat njuolga Stáhta Luonddubearráigeahččui, dahje «Skandobs» bokte.
