Ráhkadan govvačájáhusa sámi historjjálaš dáhpáhusain sámeservodagas.
– Ožžon sámi ustibiid go studerejin Romssas 70-logus. Čohkkájin dávjá singuin «sámi čiegas» Prelatenis. Ledjen singuin maid sámefeasttain, dán muitala govvideaddji Ola Røe, mo son oahpásmuvai Sámiin.
Ola Røe álggahii su govvendoaimma dan áigodagas go Sámis dáhpáhuvai olu mii lea mearkkašan olu sámi servodahkii. 1970-loguin álggahuvvui dekoloniseren ja revitaliseren Sámis. Sápmelaččat háliidedje eret beassat koloniseremis ja háliidedje ealáskahttit kultuvrraset.
Dokumenteren govaiguin sámi servodatdáhpáhusaid
Čájáhusa bokte dokumentere dán ođđa áiggi sámi servodagas. Dat álggahuvvui «Álttá-áššiin», man boađus lei ahte sámeálbmoga stáhtus Norggas nannejuvvui. Das rájes loktanii vuoibmi dekoloniseremis ja sámekultuvrra ealáskahttimis.
Govvejeaddji Ola Røe leamaš guovddážis dokumenteremiin dán deaŧalaš áiggi sámi historjjás.
– Fárrejin Guovdageidnui 80-logus. Ássen doppe moadde jagi. Doppe bargen maid ovttas govvejeaddjiin Harry Johanseniin, gii lea sápmelaš, lohká Ola Røe.
Čájáhusas beasat oaidnit su govaid maid lea govven dan 40 maŋimuš jagis, 1979 giđa rájes 2019 rádjai. Lea govva- ja teakstačájáhus. Čájáhusráhpan lea 6. beaivve guovvamánus, dii. 14:00 Davvi álbmogiid guovddážis Olmmáivágis.
