Guhkesbearjadaga lei Guovdageainnus mánáidkonsearta Davvi Divisionis, gos boahttevaš kulturguoddit besse ieža rohttestit luđiid.
Davvi Division láve dávjá dievvat go doppe leat konseartalágideamit, muhto dál vissa časke olahusa go badjel čuođi olbmo bohte geahččat ođđa juigiid buolvva. Mánát ledje áŋgirat viehkalit lávdái ja rohttestit buotlágan luđiid, leaš dal olbmuid luođit dahje beakkánis klassihkkarat.
GEAHČA GOVAID:
Láidesteaddji Mathis Eira sávai bures boahtima buohkaide, ja bivddii buohkaid, geat áigo juoigat, čálistit iežaset nama listui. Dalle ii lean ge guhká ovdal go máŋga listtu ledje visot dievvan.
Easka badjánii miella go de nuorra juoigit dohppejedje mikrofovnna ja dajahalle dan beakkán Deanu-Máijjá.
Dehálaš geahččalit jagi miehtá buktit dakkár fálaldaga
Anthoni Hætta mielas lea hirbmat dehálaš ahte mánát ja nuorat maid besset searvat iešguđetlágan kulturdoaimmaide, earenoamážit beassážiid áigge, go eanas lágidemiin lea rávisolbmuid ahkemearri.
– Seammás lea dehálaš geahččalit birra jagi lágidit dakkár doaimmaid, jus kultuvrra galgá nannet ja seailluhit. Mánát han leat boahttevaš kulturguoddit, lohká Hætta.
Orru ge čájehuvvome ahte lea ávki lágidit dakkár doaluid, sihke dan dihte go mánát leat áŋgirat lávddis juoigat, ja go nu oallugat bohtet maid geahččat. Hætta einnosta ge ahte leat časkán gehččiidolahusa Davvi Divisionis dáinna konsearttain.
– Min loguid mielde leat sullii 120 olbmo boahtán deike, moddje Hætta.