Gaskavahku cuoŋománu 13.b. diibmu 16:00, Guovdageainnu Beassášfestivála oktavuođas, rahpet čájáhusa «Go sápmelaš lea alla vári nalde, de sus lea oba čielggas jierbmi».
Čájáhus lea olggobealde Sámi arkiiva, mii lea čájáhusa doallogoddi rahpaneahkeda cuoŋománu 13.b. ja gitta geassemánu 2022.
Govaid lea reportášagovvideaddji ja journalista Elisabeth Meyer govven Kárášjogas ja Guovdageainnus 1940 giđa.
Guovdageainnu historjásearvvi jođiheaddji Nils Johan Heatta ja Liv Østmo leaba jođihan barggu identifiseret Meyera govvačoakkáldaga. Barggus soai leaba jearahallan áigevihtaniid, identifiseren olbmuid ja báikkiid, čohkken muitalusaid sis geat deaivvadedje Meyerin ja Guovdageainnu eallima birra ovdal soađi.
Juoigi Ellen Anna Buljo Stabursvik juoigá olbmuid ja fulkkiid geain sáhttet leat čanastusat čájáhusa govaide.
Čájáhus lea máŋggajagáš ovttasbargoprošeakta gaskal Romssa ja Finnmárkku fylkkagirjerádjosa, Guovdageainnu historjásearvvi, Guovdageainnu gillišillju/Riddo Duottarmuseat ja Kárenaš Sámi Giella- ja kulturguovddáža.
