Norgga Luonddudutkaninstituhtta lea vuorjašuvvan go gottit eai guotte doarvái misiid. Eai goassege ovdal leat nu unnán misiid lohkan njiŋŋalasaid ektui Knutshø guovllus go dán jagi. Lea seamma heajos dilli eará goddeguovlluin, erenoamážit Dovre duoddaris.
Jahkásaččat lohkkojuvvojit goddemiesit measta buot dan 24 goddeguovllus Norggas, mii lea oassi kvalitehtanjuolggadusaid ektui. Earret muhtin spiehkastagaid, de leat dán jagáš logut surgadis lohkan. Knutshø guovllus gávdne 100 njiŋŋelasa ektui dušše 34 miesi. Kvalitehtanjuolggadusa ektui livččii rukses čuovga (heajos kvalitehta) čuovgan, guovtti jagi (gaskamearálaš kvalitehta) miesseguoddima ektui seamma guovllus.
– Lassin dan heajos lohkui, leamaš vuorjašuhtti dilli guhkit áiggi. Mii eat dieđe manin miesselohku lea nu njiedjan, muhto sivva soaitá leat seahkálas. Danin dárbbašit mii eanet máhttu, lohká Norgga Luonddudutkaninstituhta (NINA) seniordutki Brage Bremset Hansen preassadieđáhusas.
Gottiid miesseguoddin lea muđui heittot miehtá Dovre. Guovllus lea dán jagi goddi ráfáidahtton. Báikeolbmot oaivvildit olu boraspiriid, eanaš getkkiid, váikkuhit dan dillái.
– Kvalitehtanjuolggadusaid ektui čuovvu maid misiid njuovvandeaddu seamma heajos dili. Jáhkkimis gullet unnán miesit ja njuovvandeaddu oktii, lohká Bremset Hansen.
Son jođiha ođđa goddedutkan- ja ovdánahttinprošeavtta Snøhetta ja Knutshø guovllus ja sii leat merken gottiid GPS-mearkkaiguin, vai ožžot dárkilit dieđuid. Bremset Hansen lohká goddebivdduin sáhttá hálddahus eanemus váikkuhit ja sáhttá geahpedit bivddu vai goddelohku lassána.
