Gonagas Harald rabai Norgga Álbmotmusea «Finnmárkku» čájáhusa mas oaidnit smávvadállodoalu mii huksejuvvui Porsáŋgui maŋŋel nuppi máilmmisoađi.
Viessu ja návet mat huksejuvvo Porsáŋgui maŋŋel nuppi máilmmisoađi leat sirdojuvvon Norgga Álbmotmusea Olgoeallinmuseii.
Čájáhus galgá oahpahit olbmuide finnmárkulaččaid eallimiid birra sihke ovdal ja maŋŋel soađi.
Viessočájáhusa rabai gonagas Harald bearjadaga.
Porsáŋggu sátnejođiheaddji Aina Borch čuovui rahpama, Trygve Beddari ja Anne Margaret Nilsen ovdanbuvttiiga kvena musihka ja girječálli Marion Palmer ges logai teavsttaid jitnosit, čállá NTB.
