Gonagas Haralda buohccindieđihuvvui čibbečuohpahallama dihte guovtti vahkku áigi, ja dál guhkiduvvo mánuin.
Gonagas lea ain lášmmohallamin čuohpahallama maŋŋel, dieđiha Gonagasšloahtta bearjadaga.
– Doavttir lea ávžžuhan eambbo návccaiduhttima ovdal go gonagas fas máhccá su vuođđolágalaš bargguide, dieđiha Gonagasšloahtta.
Gonagas lea dál gonagasa geassesajis, gos oažžu fysioterapiijadivššu.
Čuohpahallan lihkostuvvan
Buohccindieđiheapmi guhkiduvvo sotnabeaivái, njukčamánu 14. beaivái.
Gonagas sisačálihuvvui Rikshospitalii ođđajagemánu 29. beaivvi ja čuohpahalai beaivvi maŋŋel. Son lei suona vahágahttán bajábeale olgeš čippi. Gonagasšloahtta dieđihii ahte čuohpahallan manai bures.
Dan botta go gonagas lea buohccindieđihuvvon, de čađaha ruvdnoprinsa Haakon gonagasa bargguid.
Dat lea dušše okta dan máŋga buohccindieđihemiin mat gonagasas leat leamaš maŋimuš jahkebeali. Jagis 2020 lei son buohccindieđihuvvon čakčamánus váibmočuohpahallama oktavuođas, ja diimmá ođđajagemánus buohccindieđihuvvui son oaivejorjorgása dihte.
Koronavaksinerejuvvon
Vahkku áigi gullui ahte gonagasbárra leigga geargan koronavaksineremiin maŋŋel go leigga ožžon eará vaksiidnadosaid.
Gonagasbárra leigga vuoruhuvvon iežaska rollaid dihte, muhto maiddái go leaba riskajoavkkus iežaska agi dihte, dieđihii dearvvašvuođaministtar Bent Høie dalle go gonagasbárra oaččuiga vuosttaš vaksiidnadosa ođđajagemánu 13. beaivvi.
Ođđajagemánu 17. beaivvi dán jagi lei 30 jagi áigi go Gonagas Harald válddii badjelasas truvnna maŋŋel go gonagas Olav jámii 1991:s.
