Kong Harald, gii lea Suodjalusa bajimuš kommandánta ja generála, galledii vuossárgga Joint Viking militearahárjehallama. Gonagas galgá gitta Ruošša rájá lusa.
Oassin galledeamis galgá gonagas earret eará deaivvadit soalddáhiiguin Mátta-Várjjaga Garnisonas, geat fáktejit Norgga-Ruošša rájá. Son galgá maid geahččat rusttegiid mat geavahuvvojit dálvehárjehallamis.
Galledeamis galgá Gonagas maid galledit Ruovdavuona rádjestašuvnna mas lea ovddasvástádus sullii beali Ruošša rájás. Ukraina soađi dihtii lea gearggusvuohta rádjeguovllus nannejuvvon.
Sullii 20 000 Norgga ja lihtolaš soalddáhat leat mielde Joint Viking militearahárjehallamis, mii álggahuvvui njukčamánu 6. beaivvi ja bistá 16. beaivái. Mannan vahku galledii ruvdnoprinsa Haakon Norgga ja lihtolaš soalddáhiid geat leat mielde dán jagaš hárjehallamis.
(©NTB)
