-Almmuhus-
-Almmuhus-
Featured box1Golmmas evttohuvvon jođiheaddjin

Golmmas evttohuvvon jođiheaddjin

-

-

Guovdageaidnulaš evttohuvvon NBR jođiheaddjikandidáhtan, lassin lea vel guokte eará evttohasa boahtán NBR válgalávdegoddái. 

Guovdageainnu Johttisámiid searvi lea jahkečoahkkimis miessemánu 25. beaivvi evttohan Biret Marie E. Eira jođiheaddjikandidáhtan Norgga Boazosámiid Riikasearvái (NBR).

Berit Marie P. Eiras lea guhkes politihkalaš vásáhus. Son lea leamaš smávit lávdegottiin, boazodoallostivrras ja sámediggeráđis, ja lea ain dál sihke NBR- ja Guovdageainnu suohkana stivrras ja Sámedikkis politihkkáriin. Boazodoallopolitihkka lea su váimmu guovddážis, go ieš lea maid bajásšaddan boazodoalus. 

Olles stivra válggas

NBR lágida riikkačoahkkima geassemánu 17-18 beivviid Mo i Ranas, olles NBR stivra lea válggas. Pandemiija geažil lea riikkačoahkkin máŋgii maŋiduvvon. Dálá jođiheaddji Ellinor Marita Jåma lea luohpan jođiheaddjin, go lea virgáduvvon Ravrvihken tjïelte suohkandirektevran. Dál doaibmá Inge Even Danielsen jođiheaddjin. 

Loga maid:
Buktá hásta­lusaid sutnje go NBR riika­čoahkkin lea maŋi­duvvon

Golbma kandidáhta

NBR válggalávdegoddi jođiheaddji Torstein Appfjell muitala diibmá ledje guokte kandidáhta, muhto jahkečoahkkin maŋiduvvui ja dál lea vel goalmmát kandidáhta ovddiduvvon, Inge Even Danielsen.

– In dieđe lea go diimmá kandidáhta guovttos ain mielas leat kandidáhtan, dan fertet vel čielggadit, muhto jus leaba de lea golbma kandidáhta. Mii válggalávdegottis fertet jearahit sin ja ovddidit min evttohusa riikačoahkkimii, lohká Torstein Appfjell.

NBR válgalávdegoddái ledje diibmá boahtán guokte evttohusa čálalaččat, dat leaba várnjárgalaš Jan Ivvár Smuk ja guovdageaidnulaš Berit Marie P. Eira. Dál lea vel lassin boahtán Inge Even Danielsen guhte dál doaibmá NBR jođiheaddjin. 

-Almmuhus-