Guovvamánus jápme golbma olbmo Norgga johtolagas.
Guokte dievddu ja okta nisu jápme johtolatlihkohisvuođain guovvamánus. Dássážii leat oktiibuot ovcci olbmo duššan Norgga geainnuid alde dán jagi. Diibmá jápme 17 olbmo johtolagas jagi guovtti álgo mánus.
– Dađi bahábut jápme guokte biilavuoddji ja okta vázzi Norgga johtolagas guovvamánus. Seammás registreret ahte jápminlihkohisvuođat leat arvat njiedjan diimmá ektui. Dalle jápme ovcci olbmo guovvamánus ja masá beali eanet dušše guovtti álgománus. Dál sávvat ahte jápminlihkohisvuođat eai lassánan eanet 2021:s, lohká Trygg Trafikk gulahallanráđđehaddi Christoffer Solstad Steen preassadieđáhusas.
Beaškkihit oktii
Guđas dain geat leat jápmán johtolatlihkohisvuođain dán jagi leat duššan danin go biillat leat beaškkihan oktii. Beali dáin lihkohisvuođain ledje stuora vuodjenfievrrut seaguhuvvon.
– Go vuodjenfievrrut beaškkihit oktii, de leat dávjá duođalaš váikkuhusat lihkohisvuođas. Vaikke biillat leat šaddan sihkkarabbon, de ii leat olbmo rumaš nanusmuvvan. Danin lea rievttes sihkkarastin ja rievttes leaktu mii mearrida lihkohisvuođa sturrodaga. Lihkus geavahit eatnašat biilaboahkána vuojedettiin, muhto ain gávdnojit mátkkálaččat geat leat šluđut dán ektui. Go geavaha biilaboahkána, de lea dehálaš ahte dan čavge ja bidjá dan riekta, dasa lassin galgá nuollat stuora olgojáhkaid go čohkká biillas, dadjá Steen.
Ii berre hohpohallat
Guovvamánus deaividedje jápminlihkohisvuođat Vikenis ja Vestlánddas. Dássážii dán jagi leat eanemus olbmot jápmán johtolagas Vikenis, Romssas ja Finnmárkkus ja Vestfoldas ja Telemárkkus. Buot dán golmma fylkkas leat guokte olbmo duššan johtolagas.
– Muhtin guovlluin gal lea dálveluopmu jo nohkan, muhto muhtin sajiin lea dálveluopmu dán vahkkus. Dat mearkkaša ahte johtolagas leat olu mátkkálaččat. Dán muttus áigge jagis lea maid hástaleaddji vuodjit biillain Norgga geainnuid alde. Sáhttá leat gálja dahje lea dan mađe garra dálki ahte biilavuoddjái lea váttis oaidnit vuojedettiin. Danin ávžžuhit ahte olbmot mátkkoštit várrogasat ja ahte geavahit buori áiggi mátkkis, loahpaha Steen.
