Romssas leat dál guokte Ruošša guollefatnasa main bargiide lea njommon koronavirus.
Vuossárgga čađahedje 181 koronaiskosa Romssa suohkanis. Golmma guolásteaddjis duođaštuvvui koronavirus. Sii barget guovtti Ruošša guollefatnasis mat leat Romssa gáttis.
Oktiibuot leat Romssas njeallje olbmo isolašuvnnas koronavirusa njoammuma geažil. 67 olbmo ges leat erremis danin go leat koronabuhcciid lagasolbmot, dieđiha Romssa suohkan.
Davvi-Norgga universitehtabuohcceviessu ges dieđiha ahte sin buohcceviesuin leat guokte koronapasieantta.
Boahkuheapmi
Romssas leat 35 639 olbmo dieđihan ahte háliidit koronaboahkuid.
Dássážii lea suohkan bohkuhan 2284 olbmo oktii, guokte dálkkasnálu leat addán 636 olbmui.