Lea geassi ja luomut maid álget. Stáhta geaidnoduoimmahat fuolastuvvá buot johtolatlihkohisvuođaid dihte mat leat leamaš maŋimuš áigge.
Vuosttaš guđa mánus 2022:s leat juo leamaš olu bahás lihkohisvuođat miehtá Norgga. Dán giđa leat leamaš golmma geardde eambbo sorpmi diimmá giđa ektui. Geassemánus leat juo gávccis sorbmejuvvon johtolagas. Diibmá geasi sorbmejuvvojedje oktiibuot 29 olbmo johtolagas geassemánus, suoidnemánus ja borgemánus.
– Dat lea lassáneamen boasttu guvlui. Leat vásihan ahte geasset leat eambbo lihkohisvuođat go muđui. Lea áigi goas olusat johtet ja oppalaš alit leavttuin, mii dahká stuorát vára lihkohisvuhtii, dadjá johtolatsihkarvuođa ossodatjođiheaddji, Guro Ranes, preassadieđáhusas.
Golbma váldosiva lihkohisvuođaide
Alla leaktu, heajos fuomášupmi ja váibasat leat sivvan 40 proseantta daid bahámus lihkohisvuođaide. Luomus olbmot vudjet mihá guhkit go masa leat hárjánan, ja dat gáibida ávvira, aicilvuođa ja návccaid.
– Meroštala buori áiggi, váldde bottuid ja molsso vuoddji jus lea vejolašvuohta, ávžžuha Guro Ranes.
– Min golbma lassirávvaga leat: Geavat biilaboahkána, doala leahttoráji alege vuoje gárrenoaivvis, nu ahte luodda lea dorvvolaš sihke dutnje ja earáide, dadjá son.
