Deanu heaibunsearvi oassálasttii Arctic Cupas Arkhangelskas, Ruoššas, mannan vahkkoloahpa, gosa 350 heaibu ledje čoahkkanan. Doppe viežžaleigga guokte Deanu heaibu sihke golli ja silbba ruoktot.
Deanu heaibunsearvi oassálasttii Arctic Cupas Arkhangelskas, Ruoššas, mannan vahkkoloahpa, gosa 350 heaibu ledje čoahkkanan. Doppe viežžaleigga guokte Deanu heaibu sihke golli ja silbba ruoktot.
Synne M. Haagensen vuittii iežas luohkás, mii lea 56 kilosaččaid luohkká.
Vuosttaš gilvvus heaibbui buori heaibu vuostá Yaroslavas, Moskvas eret, ja vuittii heaibuma.
Son vuittii maid nuppi Arkhangelska heaibu vuostá. Das son bonjastii dan heaibu láhttái ja vuittii golli.
Ii olihan áibbas bajás
Gunn Rita Boine searvvai fas 65 kilosaš luohkás, mas ledje guhtta heaibu.
Son vuoittáhalai Moskva heibui vuosttaš heaibumis. Nuppi heaibumis vuittii son Arkhangelska heibui.
Finálas heaibbui ges Yaroslav heaibu vuostá, ja Gunn Rita manahii čuoggáid ja vuoittáhalai. Dan ovddas faskii silbba.
Nieidaheaibun Arkhangelskis
Lea jagi áigi go heaibunsearvi Olimp Arkhangelsk álggahii heaibuma nieiddaide.
BK Tana háliidii vuolgit Arkhangelskii ja ásahit oktavuođa nieiddaiguin geat heibot ja nannet ovttasbarggu servviin.
Olimp Arkhangelsk lea máŋgii searvan gilvvuide Deanus, ja 30 heaibu bohtet Detnui ođđajagemánus go Tana Cup lágiduvvo.
Dalle bohtet maid nieidaheaibut vuosttaš geardde Olimp Arkhangelskas Detnui.
– Nieidaheaibun Orjješdavábealde Ruoššas ii leat nu dábálaš, muhto Deanu heaibunsearvi sávvá ahte eará searvvit Barentsguovllus ožžot nieiddaid mielde heaibumii, čállá Deanu Heaibunsearvi preassadieđáhusas.
Prošeakta lea ožžon ruhtadoarjaga Barentsčállingottis.
Oktasaš hárjehallan
Deanunieiddat lágideigga maid hárjehallama Arkhangelska nieidaheaibuiguin ovdal gilvvuid.
Eará searvvi heaibut maid sávve beassat dán hárjehallamii man Gunn Rita Boine ja Synne M. Haagensen lágideigga.
