Márjjábeaivvit ođasmahttet njoarostangilvvuid. Lihkadeaddjistoalpput ja 500 euro vuoitun galgá geasuhit eambbo ja ođđa oasseváldiid gilvvuide.
Ihttin messostallagohtet Eanodagas Suoma bealde go dalle lea fas áigi lágidit Márjjábeivviid. Dolin lei girkostallan mii geasuhii sámiid Márjjábeivviide, ja váikke dál ge girkostallet de lea njoarostallan ja heargevuoddjin guovddážis.
Gollegiehta
Márjjábeaivvit ođasmahttet njoarostangilvvuid, stoalpput mat lihkadit dego bohccot ja buoret vuoittut galget geasuhit eambbo ja ođđa gilvaleddjiid.
– Olbmot leat háliidan lihkadeaddji stoalppuid, seammalágan gilvvut ledje Soađegilis ja doppe geasuhedje olu olbmuid. Mii háliideimmet rievdadit gilvvuid vai eai leat dušše seamma olbmot geat servet. Ođđa njoarostangilvvuid namma lea gollegiehta, muitala Márjjábeivviid lágideaddji Elen-Anne Sara.
500 euro
Márjjábeivviid njoarostangilvvu vuoittit leat rievddadan jagis jahkái, muhto gaskamearálaččat láve vuoitu lagabui 100 euro. Dál duppalastet vuoittu máŋgii.
– Sihke nisson- ja dievdoluohkás oažžu vuoiti 500 euro, dasa lassin leat mis eará ruhtavuoittut ja skeaŋkkat. Mii lasihat vuoittuid ja geasuhivččiimet eanet olbmuid. Njoarosteamis šaddá eanet árvu ja sihke dássi ja gilvu buorrána go eambbosat servet. Mii maid oažžut eambbo sisabeassan ruđaid, čilge Sara. 500 euro lea sullii 4300 Norgga ruvnnu.
Buohkaide juoidá
Márjjábeaivvit bistet olles vahkkoloahpa. Ollesolbmuid njoarostangilvu lea lávvardaga ja nuorabuidda lágiduvvo gollegiehta sotnabeaivvi. Goappašat beivviid lágiduvvo maiddái árbevirolaš heargevuoddjingilvu. Eahketbeallái lea bearjadaga retro-eahket, dalle gárvodit dološ biktasiiguin, suohtastallet ja muittašit. Lávvardat eahkeda doallá Kárášjoga joavku Felgen Orkester konsearta. Sotnabeaivvi lea sihke márkanastin ja girkostallan Eanodagas. Dasa lassin lea teáhterčájálmas ja luohtebádji prográmmas.
– Vaikke dán jagi lea prográmma maŋŋit ilbman, de olbmot aŋkke dihtet Márjjábeivviid birra ja mii sávvat ahte oallugat bohtet, dadjá lágideaddji Elen-Anne Sara.
Stuorámus doalut
Márjjábeaivvit leat áidna sámi doalut Eanodagas ja Márjjábeivviide lávejit miehtá Sámi boahtit olbmot.
– Márjjábeivviin lea stuora mearkkašupmi Eanodahkii. Márjjábeaivvit leat stuorámus Sámi doalut guovllus mat čohkkejit oallugiid. Mis lea juoga buohkaid várás, sihke mánáide, ollesolbmuide ja vuorrasiidda, loahpaha Sara, gii sávvá buohkaide bures boahtima.
