-Almmuhus-
-Almmuhus-
-Almmuhus-
VALÁŠTALLANGollegiehta faskii čakčaskohtera

Gollegiehta faskii čakčaskohtera

-

-

Dán jagáš Gollegiehtan šattai guovdageaidnulaš Mikkel Mathis Hætta. Heahtá Márjjábeivviin njoarostii son nuppes ođđa vuojána alcces. Geahča video áššis go vuoddjá vuoitovuojániin!

Guovdageaidnulaš Mikkel Mathis Hætta vuittii njoarostangilvvu Heahtá Márjjabeivviin, ja šattai dán jagáš gollegiehtan. Dán jagi gilvaledje mánát, nissonolbmot ja dievddut seamma luohkás.

– Lei hui gelddolaš gilvu, lea álo hui somá njoarostit lihkadeaddji stoalppuid, lohká vuoiti Ávvirii.

Mikkel Mathis Hætta lohká gilvvu šaddat gelddolaččabun go lihkadeaddji stoalpput leat, sihke njoarosteddjiide ja gehččiide.

– Lea gelddolaš go leat guovttis ja guovttis vuostálagaid, ja goabbá čoaggá eambbo čuoggáid, manná viidáset, lohká Hætta.

 

– Buorre vuoitu geasuha

Gilvvus ledje 24 oasseváldi, nissonolbmot ja dievdoolbmot vuostálagaid. Mikkel Mathis Hætta vuittii, Ovlla Sara bođii nubbin, ja Joar Rasdal goalmmádin.

Hætta lohká sus ledje olu buorit gilvaleaddjit. Son lei vuoitinnammii vuolgán gilvalit.

– Ledjen dušše njoarostangilvui vuolgán, buorre vuoitu dat geasuha. Dieđán sulaid ahte mus lea garra vejolašvuohta vuoitit, lohká Hætta.

 

Vuoitu lea Irbis T150 skohter, dahje čakčaskohter, nu go lágideaddjit gohčodit dan. Dan čáhkkeha dábálaš persovdnabiilla maŋágeahčái.

– Lea buorre skohter, muhto in leat vel mearridan maid dagan dainna, lohká gollegiehta.

– In vuovdit gal meine, vuoittu ii ábut vuovdit, lasiha son.

 

Máŋga vuojána vuoitán

Ii leat ge vuosttaš háve go Mikkel Mathis Hætta vuoitá mohtorvuojána njoarostangilvvus.

Mannan čavčča lágidii Team Nils Jøran njoarostangilvvu Guovdageainnus.

Das lei vuoitu njealjejuvllat vuoján, ja dan vuittii Mikkel Mathis Hætta.

(Ášši joatká gová vuolábealde)


VUITTII NJEALJEJUVLLAGA: Čakčat vuittii Mikkel Mathis Hætta njoarostangilvvu Guovdageainnus. Das lei njealjejuvllat vuoitun.  Govven: Nils Johan Vars.
 

– In dieđe mas boahtá, ferte luonddus boahtit. Ferte unnin álgán, mun lean dalle go vázzit álgen, suohpaniin njorostallan. Ovdal láviimet maid njorostallat ruksesmisiid, das dat boahtá dáidu, čilge Hætta go Ávvir jearrá movt son lea šaddan nu buorren njoarostit.

– Mun liikon njoarostit lihkadeaddji diŋggaid, boazobarggus beaivválaččat njoarostan, lea measta seamma gilvvus maid. Lea hui oahpis munnje, lohká vuoiti.

-Almmuhus-