-Almmuhus-
OĐĐASATGolgodávda leavvá miehtá Norgga dál

Golgodávda leavvá miehtá Norgga dál

-

-

Dál lea golgodávda leavvan measta miehtá riikka, ja orru čájeheame ahte dál lea eanemus golgodávda ovdal go lohku fas njiedjá.

Juovlabasiid čájehuvvui ahte golgodávda lassánii hirbmosit. Vearrámus lea Østlánddas, erenoamážit Oslos ja Akershusas, muhto Trøndelágas buhcet maid ollugat. Eanemus lassáneapmi juovlabasiid lei Møre ja Romsdalas ja Opplánddas. Finnmárkkus, Romssas ja Sogn ja Fjordanes eai leat nu bahát buohcan, ja golgodávda ii leat nu beare viidát leavvan.

 

Orru njiedjame, muhto eai vel dieđe
Mannan vahkku sáddejuvvojedje unnit iskosat laboratoriai.
– Dat lea dábálaš minsttar, ja boahtte vahkkuid easka oaidnit buorebut lea go lassáneame vai njiedjame golgodávda, dieđiha Álbmotdearvvašvuođainstituhtta.
Golgodávda orru šaddame garraseamos golgodávdan mii lea máŋgga jahkái leamaš. Leat eambbogat geat ožžot duođaštuvvot iskosiin ahte lea golgodávda. Eanet go ovddit dálvvi, ja eanet go muđuid láve dán áigodagas.

 

Eai leat dieđihuvvon golgodávddat dearvvašvuođaásahusain maŋemus vahkku. Dán jagáš virus čuohcá garrasepmosit vuorraset olbmuide. 356 buohcci ledje mannan vahkku geavvan buohccivissui go lei golgodávda, ja eatnasat sis ledje badjel 60 jagi boarrásat. (©NTB)

-Almmuhus-