-Almmuhus-
-Almmuhus-
-Almmuhus-
SMÁVVAOĐĐASATGolbma ođđa sámi prošeavtta ožžot doarjaga fylkka­gielddas

Golbma ođđa sámi prošeavtta ožžot doarjaga fylkka­gielddas

-

-

Dán háve leat Álttá Sámi Giellaguovddáš, SVD Musea- ja historjásearvi Kárášjogas ja Čáhcesullo joatkkaskuvlla sámi juogus mat ožžot doarjaga prošeavttaide mat vuosttažettiin leat oaivvilduvvon mánáide ja nuoraide.

Romssa ja Finnmárkku fylkkagieldda ekonomiija ja kultuvrra fylkkaráđđi Ronald Wærnes (Guovddášbellodat)  illuda go beassá doarjut golbma ođđa sámi prošeavtta Finnmárkkus.

– Mu mielas lea deaŧalaš váikkuhit ahte mánát ja nuorat ožžot lasi dieđuid ja máhtuid sámi gielas, historjjás ja kultuvrras. Prošeavttat mat dál ožžot doarjaga, leat oaivvilduvvon aiddo fal dása veahkkin, seammás go prošeavttain lea nanu báikkálaš ja guvllolaš vuođđu, dadjá fylkkaráđđi Ronald Wærnes (Gb) preassadieđáhusas. 

Duodjedoahpagiid dárogillii

Álttá Sámi Giellaguovddáš oažžu 50 000 kruvnnu ráhkadit ja almmuhit gihppaga mas leat sámi duodjesánit dárogillii. Dárogielgihppaga veagas gaskkustit sámi doahpagiid mat gullet árbevirolaš duddjomii. Gihpa galgá lassin duddjoma vuođđoterminologiijai earret eará sisdoallat govaid dujiin, muhtin goarrunteknihkain ja dábálaččamus duodjeosiin.

Musea ávvuda 50-jagi

SVD Musea- ja historjásearvi Kárášjogas oažžu 50 000 kruvnnu čalmmustit Sámiid Vuorká-Dávviriid 50-jagi jahkásaš doaimma. Sii ávvudit 50-jagi doaimma jagi 2022. Musea leai vuosttaš sámi kulturinstitušuvdna mii vuođđuduvvui ja man ulbmil lea nannet sámi giela ja kulturáddejumi Norggas. Ruhtačoaggin ja báikkálaš olbmuid áŋgiruššan dagai musea álggaheami vejolažžan. Jagi 2006 rájes lea SVD ovttastahttojuvvon RiddoDuottar Museaid vuođđudussii oktan Porsáŋggu, Guovdageainnu ja Hámmerfeastta Jáhkovuona museain, ja maiddái Sámi dáiddačoakkáldagain Kárášjogas. Musea hálddaša badjel 5 000 dávvira, ja geavaha sámegiela bargogiellan.

Giellaoahpahus gárddis

Čáhcesullo joatkkaskuvlla sámi juogus oažžu 6 000 kruvnnu gaskkustit dieđuid ja máhtuid árbevirolaš ealáhusas ja oahppaladdat boazogárddi Gánešnjárggas. Sámi juogus áigu finahit sámegiela ohppiidis Gánešnjárgga boazogárddis Várnjárggas čakčat 2022. Doppe galget árbevirolaš ealáhusbarggut leat oassin skuvlla sámegielfágas, ja giellaoahpaheaddjit áigot badjeolbmuid oahppalattadettiin geavahit gárddástallama oahpahusa vuođđun. Ulbmil lea nannet ja lasihit ohppiid sámegiela sátneriggodaga ja searvvahit sin sámi kulturdoaimmaide.

-Almmuhus-