-Almmuhus-
-Almmuhus-
OĐĐASAT Golbma norgga nuora biilalihkuhisvuođas suoma bealde

Golbma norgga nuora biilalihkuhisvuođas suoma bealde

-

-

Gaskavahkku ovdalaš gaskaija geavai biilalihkuhisvuohta suoma bealde Gámasmohkkis, mas golmma norgga nuorain okta sáddejuvvui gádjunhelikopteriin UNN:ii.

Suoma politiija dieđihii lihkuhisvuođa birra, mii lei geavvan Gámasmohkkis, Ohcejoga gielddas gaskaija sulaid gaskavahkku, mas golbma norgga nuora ledje mielde ja okta sis sáddejuvvui Tromssa Universitehta buohccivissui.

 

Ii nagodan stivret

Lappi bolesguovddáš čállá preassadieđáhusas ahte ledje golbma norgga nuora boahtimin Gáregasnjárgga guovllus Gápmasa guvlui.

– Go biila joavddai Gámasmohkki gillái, de ii leat biilavuoddji nagodan stivret biilla ja jávkkehii badjel geainnu gurut bealde. Biila geavai loahppas robi ala sogiid sisa. Vuosttažin báikkis ledje Gáregasnjárgga buolliveahka addimin vuosttašveahkki, man maŋŋel roasmmohuvvan olbmot sirdojuvvojedje norgga buohccibiillain Norgii. Boles joatká dutkama, boahtá ovdan preassadieđáhusas.

Bivde veahkki

Neahttaáviisa iFinnmark čálii ovddemuš áššis ja ledje leamaš oktavuođas sihke Váldogádjunguovddážiin ja Finnmárkkubuohccivisuin, gos duođaštedje sin bivdán Leavnnja Banakis SeaKing gádjunhelikoptera veahkkin lihkuhisvuođabáikái.

 – Galget leat norgalaččat leamaš mielde lihkuhisvuođas, muitalii diehtojuohkinhoavda Ivar Greiner iFinnmark iFinnmark neahtaáviisii.

Dolvo ovtta Tromsii

Gaskaija maŋŋel eai vuos diehtán man duođalaš dilli lei, muhto iFinnmark oaččui dieđu diibmu 01.50 ahte gádjunhelikopter lea viežžan ovtta olbmo.

– Gádjunhelikopter lea váldán ovtta olbmo mielde ja lea jođus Davvi-Norgga Universitehta buohccivissui Tromsii. Helikopter lea jo jođus dohko, muitalii Øyvind Aadde, preassavákta Davvi-Norgga Váldogádjunguovddážis, gii seammás duođaštii sáhka leat norgga stáhtaborgáris.

Stabiila

UNN buohcciviesu preassavákta, Per-Christian Johansen, muitalii otná iđida diibmu 07.10 ahte sis lea okta almmái buohcciviesus, gii lei mielde lihkuhisvuođas.

– Son ii leat nu garrasit roasmmohuvvan, oažžu divššu ja stabiila, muitala son iFinnmakii.

 

 

 

 

 

 

- Advertisement -
-Almmuhus-