Ráđđehus háliida doarjut filmmaid čájeheami smávvit báikkiin Finnmárkkus. Lea 13 jagi dassái go gilikino lei olámuttus miehta fylkka.
Daidda ulbmiliidda ráđđehus várre golbma miljovnna ruvnno 2024 bušeahtas.
– Finnmárku lea fylka gos leat stuorra gaskkat ja máŋgga suohkanis ii leat dál kinofálaldat. Danin Guovddášbellodat ovttas Bargiidbellodagain ráđđehusas áŋgiruššá gilikino ovddas Finnmárkkus, boahtá ovdan bellodagaid oktasaš preassadieđáhusas.
– Kino galgá olámuttus miehtá riikka. Danin lea dehálaš ahte Guovddášbellodat ráđđehusas áŋgiruššá Finnmárkku ovddas. Dat sáhttá leat hirbmat buorre kulturfálaldat olles Finnmárkui. Mun lean ovdal bargan kulturkonsuleantan ja oaidnán man dehálaš lea kinofálaldat doppe gos olbmot orrot. Dan áŋgiruššamis sáhttet leat olu gelddolaš vejolašvuođat, soaitá ásahuvvot ovttasbargu gilikinoin suohkaniiguin ja dainna lágiin ahte ásahuvvojit eanet kulturbargosajiid Finnmárkui, dadjá Guovddášbellodaga stuorradiggeáirras Geir Iversen.
Ilus
Gilikino kinohoavda Arnfinn Inderhaug illluda go háliidit vuoruhit kinočájeheami Finnmárkkus.
– Gilikino lea hui duhtavaš dainna doaibmabijuin mii loktejuvvo stáhtabušehttii. Mii háliidit ráhkadit buori plána ja boahtit fas Finnmárkui maŋŋá 13 jagi. Eanemusat illudit čájehit filmmaid mat leat gullevaččat Finnmárkui, lohká son.
