Sámedikki 2022 rehketdoalus boahtá ovdan ahte politihkkárat leat beare olu ruđa bidjan politihkalaš doaimmaide.
Boahtte vahkku lea Sámedikki dievasčaohkkin, ja okta ášši lea «Sámediggeráđi doaibmadieđáhus», mas earret eará almmuhuvvo Sámedikki 2022 rehketdoallu. Dál čájehuvvo ahte justa fal dievasčoahkkimii lea Sámediggi golahan beare olu ruđa ja muđuid lea Sámediggeráđis maid stuorra vuolláibáza dán jagi.
Sivat eanetgeavaheapmái
Sivvan go dievasčoahkkimis lea vuolláibáza lea go Sámedikkgi refušuvdnamáksin áirasiidda, geat leat manahan bálkká, lea stuorát go mannan válgaáigodagas. Dasa lassin sturrot golut go várreáirasiid šaddet geavahit. Várreáirasat ožžot duppal honorára juohke čoahkkinbeaivvis.
Sámediggeráđi rehketdoallu čájeha ahte sis gártá leat 2 289 092 ruvnno vuolláibáza. Váldosivva dasa čállet ahte lea Statsbygga rehket 3 172 149 ruvnno. Duogáš das lea ahte Sámediggi lei árvvoštallan hukset viesuid ollesáiggi politihkkáriidda. Sámediggeráđđi doallá rámmaid buot eará poasttain.
