Sámedikkis lea leamaš lagabui 7 miljovnna ruvnnu vuolláibáza man dál leat nagodan njulget, dat dattege čuohcá
Sámedikkis lea leamaš lagabui 7 miljovnna ruvnnu vuolláibáza man dál leat nagodan njulget, dat dattege čuohcá
Sámediggeráđđi Ann-Mari Thomassen lea ilus go Sámediggi lea nagodan njulget guovtti ovddit jagi vuolláibáhcaga ja bargu lea leamaš hástaleaddji.
– Dát lea leamaš gáibideaddji bargu mii lea dahkkojuvvon guovtti bušeahttajagis. Sámediggi lea unnidan váikkuhangaskaomiid politihkalaš ja hálddahuslaš dássái. Ohcanvuđot váikkuhangaskaomiin lea giella, máhttu ja ealáhus ortnegiid badjelbáza geavahuvvon gokčat vuolláibáhcaga, čilge Thomassen preassadieđáhusa bokte.
Sámediggi ovddida dál reviderejuvvon bušeahtas evttohusa loahppa vuolláibáhcaga ektui, mii lea 256 379 ru ovdal go dat lea balánssas. Vuolláibáhcaga leat evttohan njulget nu ahte unnidit ohcanvuđotdoarjaga ealáhusaide ja fitnodatovddideapmái.
– Sámedikki 2014 bušeahttamearrádusas lei čielggasmeahttunvuohta Deanu ja Várjjaga museasiidda poasttain, kulturviesuid ja museaid ektui, muitala sámediggeráđđi Thomassen.
Goappašagat poasttat gullet dattetge Deanu ja Várjjaga museasiidii, ja Sámediggeráđđi evttoha ahte dat čielggasmahttojuvvo 2015 reviderejuvvon bušeahtas.
Sámediggi láve revideret bušeahta jahkásaččat geassemánu dievasčoahkkimis, njukčamánus dahkkojuvvon jahkedieđáhusa mearrádusa vuođul, mas maiddái lea mielde jahkerehketdoallu.
