Jienasteami oktavuođas oažžu gohčodit vaikke «Donald ducken» su gean jienasta, beare buohkat dihtet gean lea oaivvildan jienastit.
Jienasteami oktavuođas oažžu gohčodit vaikke «Donald ducken» su gean jienasta, beare buohkat dihtet gean lea oaivvildan jienastit.
Go Guovdageainnu suohkanstivra válljii várresátnejođiheaddji, de ledje guokte evttohusa dasa, Anders S. Buljo ja Klemet Erland Hætta. Go namat lohkkojedje, de lei okta jienasteddjiin čállán «Sámmol-Ánte» jienastanbáhpirii, ja guovttis fas «Klemet E. Hætta». Dáloniid listtu Hans Isak Olsen válddi sátnevuoru, ja bivddi ođđa sátnejođiheaddji suohkanstivrra meannudit ášši, lea go oba lobálaš ge eará nama atnet go gásttanama.
Mánnálaš dahkku
Guovdageainnu Johttisápmelaččaid listtu (JSL) ja Bargiidbellodaga oktasaš joavkojođiheaddji, Hans Ole Eira, reagere go Hans Isak Olsen ii áiggo dohkkehit go eará namat leat geavahuvvon jienasteamis go gástanamat dán guovtti áirasis.
– Mu mielas lea die mánnálaš dahkku go ii áiggo dohkkehit jienasteami. Go čuožžu Sámmol-Ánte jienastatlihppus, na dat han lea su sámi namma, ja mii leat sámi stuorámus suohkan ja galgat maiddai leat ofelažžan earáide. Mii de galgat ovddidit dakkár gáibádusa ahte namma galgá dárogilli čállot, nammalassi Anders S. Buljo, dies ferte suohkan guorahallat lobálašvuođa, lohká Eira.
Vaikke «Donald Duck»
Olsen čilge ahte su mielas galgá visot mannat riekta go suohkanstivrras meannudit áššiid, vel namma ge galgá riekta leat.
– Muđui goit sáhttet vaikke Donald Duckan gohčodit olbmuid. Riekta gal oažžu šaddat, lohká son.
Sámi namma dehálaš
Guovdageainnu ođđa sátnejođiheaddji, Johan Vasara, ii loga šaddat nu gelddolažžan jođihit suohkanstivrra jus ná galgá leat. Son lohká diehttelasat galgá duođalaččat ja dárkilit dahkat jienastemiid, muhto galgá sámi nama maid dohkkehit.
– Mii fertet dál dieđus oažžut čielggaduvvot sáhttá go atnet sámi nama nu go jienasteamis, máid mu mielas goit berrešii sáhttit, ja de oaidnit maŋit áiggiide movt dahkat, lohká Vasara.
Departemeantta dohkkeha
Guovdageainnu ráđđeolmmái, Kent Valio, dárkkistii Ođasmahttindepartemeanttain dan nammageavaheami, ja doppe son oačču čilgejuvvo ahte dat dohkkehuvvo.
– Dat mii lea dehálaš lea ahte buohkat dihtet gean oaivvilda jus atná eará nama go gástanama, muitalii Kent Valio sárdnestuolus.
Suohkanstivra dohkkehii de liikká jienasteami loahpas.
