Norrkøping Tidning journalista gohčodii máttasámegiela «mahkášgiellan» kronihkastis Melodifestivalena birra, mas Jon Henrik Fjällgren oassálastá dán jagi. Gielladutki mielas lea dat unohas.
Norrkøping Tidning journalista gohčodii máttasámegiela «mahkášgiellan» kronihkastis Melodifestivalena birra, mas Jon Henrik Fjällgren oassálastá dán jagi. Gielladutki mielas lea dat unohas.
Maŋŋel Melodifestivalen oassegilvvuid lávvordaga, gos Jon Henrik Fjällgren ja Aninia beasaiga finálii, de čálii Erik Wallsten kronihka mii almmuhuvvui nt.se neahttasiiddus.
Kronihkas oaivvilda son ahte boasttu lávlagat manne viidáseappot gilvvus, ja čállá ahte Jon Henrik Fjällgren manai viidáseappot lávlagiin mii lea mahkášgillii.
– Issoras unohas
Vaikko kronihkka divvojuvvui mánnodaga, ja váldui eret oassi gokko gohčoda máttasámegiela máhkašgiellan, de reagere Ubmi universitehta lektor, sámegieloahpaheaddji ja gielladutki Hanna Outakoski dasa.
Su mielas lea issoras unohas go kronihkkačálli, gii galggašii čuvgehit áššiid álbmogii, ovdanbuktá dákkár ságaid ahte máttasámegiella ii leat albma giella.
– Jus lea nu ahte ii dieđe ahte lea albma giella, de lea dat oba surgat ja čájeha sus oahppováilli ja diehtemeahttunvuođa. Lea oba imaš jus ii dieđe Jon Henrik Fjällgren lea sápmelaš ja su eatnigiella lea máttasámegiella, lohká Outakoski.
Suhtuiguin čállon
Outakoski jáhkká kronihkka lea čállon go lei moaráskan, ja danne go kronihkkačálli iežas favorihtta Loreen ii beassan njuolga finálii.
– Mun jáhkán dat lei suhtuin čállon, muhto jus lea nu ahte diđii ahte máttasámegiella lea albma giella, de lea measta dat vearrát, go de han lea ovdanbuktán giellásiid mieleavttus, lohká Outakoski.
Buorre go válde eret
Dasa go kronihkka rievdaduvvui, lohká Outakoski buorren go dat nanne ahte lea suhtuin čállon ja lea fuomášan ahte leat vearrut bargan.
– Seammás lea váivi, go orru nu ahte Jon Henrik Fjällgren dat lei sin mielas boasttu artista gii manai viidáseappot gilvvus. Go ii okta ge leat cuiggodan dan nuppi artistta, Wiktoria, gii manai viidáseappot.
– Čielggas ahte sámegiella lea albma giella
Ávvir ii leat lihkostuvvan oažžut ságaide kronihkkačálli Erik Wallsten, muhto son lohká nt.se aviisii ahte son jurddašii beare njozet ja čálii beare jođánit.
– Mus lea čoavji bávččas ja heahpanan hui ládje. Mun čujuhin luohtái, ja lea čielggas ahte sámegiella lea albma giella, in ge mun oaivvildan máttasámegiela álggus lávlaga. Lei vearrut leaikkastallat dainna, ja mun dovddan sámiid historjjá go leat šaddan gillát ja dat ii leat juoga masa háliidan oassálastit. Mun ánuhan ándagassii, lohká Wallsten aviisii.
